Hiru igoera jokatu, eta hirurak lortu dituzue. Zer sentitzen da jarritako helburuak gainditzen direnean?
Motibatu egiten gaitu. Hiru igoera jokatu ditugu, eta hiru kasuetan lider bukatu dugu. Horrek indarra ematen du entrenatzen eta jokatzen jarraitzeko. Taldea sortu genuenean, helburua zen lagunartean elkartu eta futbolaz gozatzea; ondo pasa nahi genuen. Borussian aritzen garen ia guztiok jokatzeari utzi genion eta hau aukera ederra izan da. Herriko jokalariekin osatu dugu taldea, eta gazteak gara.
Hirugarren igoera hori urtarrilaren 18an lortu zenuten. Ohorezko mailako talde zarete, eta gaur duzue aurreneko partidua.
Hala da, gaur bide berria hasten da: Ohorezko Mailako aurreneko partidua dugu; eta guztia izango da berria. Grupo Delta taldea izango dugu aurrez aurre, lehen Vulco bezala ezaguna. Maila altuko taldea da. Bertan jokatzen duten jokalari batzuk aurrez Sansen arituak dira. Vasconiako jokalari ohiek ere bertan jokatzen dute. Pentsa, orain 5 urte Espainiako azken fasea jokatu zuten, Madrilen. Maila altua dutela jakinda, dena ematera atera beharko dugu; irabaztera joango gara.
Zeintzuk dira Ohorezko Mailaren ezaugarriak?
Maila gorena izanda, bizitza osoan futbolean aritu den jokalari asko ari dira bertan. Fisikoki oso ondo mantentzen dira. Borussiako jokalarien media 25 urtekoa da; oso gazteak gara gainontzeko taldeekin alderatuta. Taldeko helduenak 29 urte ditu, eta gazteenak 20. Gainontzeko taldeen media 30 urte ingurukoa da.
Joko mailataz aritu gara aurreko galderetan. Hau ere bada Ohorezko Mailako ezaugarrietako bat; eta baita gainditzeko erronketako bat.
Bai. Ohorezko Mailako partidu batzuen jarraipena egin dut eta diferentzia askorekin, alde gehien nabarituko dugun kategoria izango da. Maila honetan talde guztiak dira oso konpetitiboak. Lehia estua izaten da, eta emaitzak gutxitan izaten dira alde askokoak. Partiduko azken minutura arte izaten da borroka.
«Borussiarentzat luxu bat da maila honetako partiduak jokatzea»
«Julen anaia beti izan da erreferente nirentzat: bizitzan zein futbolean»
Futbol 7an Espainian goi mailan aritu den talde bat ere izango duzue aurkari datozen asteetan.
Bai, Zuma-Hine talde beasaindarra. 2009an, Suitzak Eurokopa jokatzera gonbidatu zuen. Bost aldiz izan da Espainiako txapelduna, eta egun ere, berak du titulu hori. Guretzat, Borussiarentzat, luxu bat da maila honetako partiduak jokatzea. Aldageletan honen inguruan bromeatu izan dugu, noizbait beraien kontra jokatuko genuela, etab. Lan asko egin dugu, eta ametsak egi bihurtu dira. Martxoaren 1ean aurrez aurre izango ditugu. Nork esango ote zigun guri, taldea sortu genuenean!
Eta gainontzeko aurkariak ezagutzen dituzue?
Batzuk ezagutzen ditugu, baina ezin gara horrekin itsutu. Orain arte bezala jarraitu behar dugu, lanean, maila ezagutu eta ilusio eta gogo berarekin entrenatzen.
Erronkaren bat izango duzue noski, denboraldi berrirako.
Egia esan, ez. Partiduz partidu jokatuko dugu eta emaitzak iritsiko dira. Eta orduan finkatuko dugu erronka edo helbururen bat.
Herri edo koadrila izaera du Borussiak. 14 gaztek osatu zenuten taldea, Hernaniko koadrila ezberdinetatik etorriak guztiak. Helburua zen elkartu, ondo pasa eta futbolean jokatzeko grina asetzea. Azkeneko bi urteetako arrakasta ikusita, erraza al da hasierako espiritu hori mantentzea?
Bai eta hori da klabea. Guztion afizioa da futbola praktikatzea, eta herriko lagunekin aritzea baino plan hoberik, gutxi! Aldageletatik ezagutzen ginen asko. Hernanin aritu izan gara, Yone Boutique taldean… Pentsa, talde bakarra gara Ohorezko Mailan patrozinatzailerik ez duena. Fitxa gure poltsikotik ordaintzen dugu! Hor ikusten da gure grina eta afizioa.
Zu zara Borussiako entrenatzailea eta kapitaina. Aurrez maisu bat izan duzu, Julen Giraldo anaia. Yone Boutiqueko erreferentea zen urte askotan. Bere bideari heldu diozula esan liteke? Aholkurik eman al dizu?
Gauza garrantzitsuagotaz ari gara. Julen anaia beti izan da erreferente niretzat: izan futbolean, izan bizitzan. Futbolari helduz, areto futbolean hasi ginenean herriko torneoetan hartzen genuen parte. Urte luzez egindako lana eta konstantziari esker, Gipuzkoako txapeldun izatera iritsi ginen. Julenek egindako lanak meritu asko du. Ni aurreneko egunetik saiatu naiz bide berari heltzen. Talde lehiakorra osatu nahi dut, guztiaren gainetik, herri izaera hori mantendu nahi dut, giro ona izatea klabea da. Borussia bide horretatik dijoa, ezagun izatetik lagun izatera pasa gara, eta hori zelaian nabaritu egiten da.