Orain 25 urte sortu zen Hernaniko Jokalari Anonimoen Taldea, 1990eko urtarrilean. Ordutik, asko izan dira bertan laguntza jaso dutenak, jokua eta apostuetatik desengantxatzeko.
Aurreneko terapiak antolatu zituzten ludopatia arazoak dauzkaten pertsona horientzat, Ongintzako Patronatuaren Drogodependentzia sailaren bitartez, Txus Congilen laguntzarekin. Horrela sortu zen Hernanin, Euskadiko aurreneko Jokalari Anonimoen taldea.
«Doakoa da, eta ez dugu inor kanpoan uzten»
Arazo bera duen edozein pertsona hartzen dute bertan: «doako zerbitzua da, eta ez dugu inor kanpoan uzten. Eskatzen dugun bakarra da, benetan jokua utzi nahi izatea».
Asteartero egiten dituzte terapiak, Sandiusterrin, 19:00etatik aurrera, eta ostegun eta ostiraletan egiten dituzte bilera informatiboak, 18:00etan. Eta senide eta lagunen terapia ere egiten dute, hileko aurreneko asteartean, 19:00etan. Informazio gehiago jasotzeko, deitu 943 33 11 03 telefono zenbakira, edo idatzi jugadoresanonimoshernani@gmail.com.