Gidatzen euskeraz ikasteak, saria izan du aurten ere, Buruntzaldeako herrietan. Atal teorikoa euskeraz atera dutenen artean, 400 euroko 11 sari banatu ziren asteazkenean, eta Hernanin, hiru lagunek jaso dute: Maddi Aranburu Gonzalok, Irati Zelaia Azurmendik eta Oihane Zalakain Gonzalezek. Hurrengo egunetan jasoko dute saria, hirurek.
Azkeneko urtean, 54 hernaniarrek atera dute gidabaimena euskeraz, herriko hiru autoeskolatan: Hernani, Lagunak eta Otamendi. Horrela, sari bat eman da euskeraz ikasteko aukera ematen duen autoeskola bakoitzeko.
Egitasmoarekin jarraitzeko asmoa, 2015ean ere bai
Buruntzaldean, guztira, 140 izan dira atal teorikoa euskeraz atera dutenak. Gorantza egin du kopuruak, egitasmoa martxan jarri zenetik: 2013an, 135 izan ziren; 2012an 112; 60 lagunek egin zuten euskeraz 2011n; eta 34k 2010ean.
Luix Intxauspe Hernaniko alkateak azaldu zuen, halaber, egitasmoarekin aurrera jarraitzeko asmoa dutela. Gainera, zabalkunde kanpainari ekingo diote, aurtengo maiatzean.