Lokal berria izango du Martindegiko auzo elkarteak. Aho batez onartu zuen Hernaniko Udaleko plenoak, asteartean, Astigarragako Udalarekin hitzarmena sinatzea: «bi herrien arteko eremu publikoan eraiki nahi da lokala, eta horrek hitzarmena eskatzen du», azaldu zuen Luix Intxauspe alkateak. Hitzarmenaren arabera, bi Udalen artean finantzatuko dute eraikina, Astigarragakoak jarriko ditu lurrak, eta auzolanean eraikiko dute.
Uraren araudia, behin betiko onartuta
Uraren araudiko aldaketa ere onartu zuen plenoak, behin betiko. Joan den azaroan, araudia aldatzea proposatu zuen Gobernu Taldeak, ur mozketak zeudenean herritarrei behar bezala jakinarazteko. Aldaketa horri, alegazioak aurkeztu zizkion oposizioak. Batzordean aztertu dira, baina Gobernu Taldeak ez ditu onartu: «teknikoen txostenek diote, ez diotela ezer gehiago aportatzen araudiari».
Gauzak horrela, alegazioak atzera bota eta araudia behin betiko onartu zuen plenoak, Gobernu Taldearen aldeko botoekin, eta oposizioaren kontrakoekin.
Uraren araudia ere onartu zuen plenoak, behin betiko, oposizioaren kontrako botoekin.
Hiru mozioak, onartuta
Jarraian, hiru mozio aurkeztu ziren, eta hirurak onartu ziren aho batez. Aurrenekoak, PSE-EEk aurkeztua, Parisen Charlie Hebdo aldizkariak jasandako erasoa kondenatu, eta giza eskubideak eta adierazpen askatasuna babesteko dei egin zuen. Bigarrena onartuta, Udalak konpromezua hartu zuen, kontra egiteko merkatal erregistroak pribatizatzea proposatzen duen Errege Dekretuari.
Eta hirugarrenarekin, eskatuko dio barne ministerioari, Hassanna Aaliaren asilo politiko eskaera errebisatu eta nazioarteko babesa emateko.
Gobernu Taldearen erantzuna, EAJ eta H1en Jasota Bezalari
Plenoa bukatzeko, Gobernu Taldeak erantzun nahi izan zion, EAJk eta H1ek Kronikan argitaratutako Jasota Bezala bati: «egia da kasu batzuetan ez dela kontratazio prozedura bete, deskoordinazioa edo urgentzia tarteko. Baina ez dugu uste horrek zalantzan jartzen duenik Gobernu Taldearen zintzotasuna. Gaindimentsionatu egin duzue gaia, eta hori komentatzeko Batzordeak daude».