Auzolan berri bati helduko dio Ziraba Proiektuak, larunbat honetan. Akola baserriaren ondoan, Putzuzar iturria eta putzua berreskuratuko dituzte, eta beste bi putzu txiki egin ondoan: «garai batean zuen itxura eman nahi diogu».
Horren berri emango dute gaur, 19:00etan Ereñotzuko Auzo-Etxean, Aranzadiko Ion Garinek eta Iñaki Sanz-Azkuek. Bertan azalduko dituzte, Putzuzar berreskuratzearen helburuak eta auzolanaren antolaketa.
Eta hitzaldian bertan, bideo bat ere jarriko dute: Akola baserrikoei tokian bertan egindako grabaketaren zati bat.
Apuntatzeko aukera, gaur
Auzolanean parte hartu nahi duenak, aurrez eman behar du izena. Horretarako, bi aukera daude: Auzo Udalera deitu (943 55 10 00), edo gaurko hitzaldian esan. Hain justu, gaur izango da azken eguna, apuntatzeko.
Larunbaterako, goizeko 10:00etan jarri dute zita, Akolako atsedenlekuan, auzolanari ekiteko. Bertatik, 25 metro eskasera dago Putzuzar iturri naturala. Oinez joatea gomendatu dute, ez baitago toki nahikorik, denak kotxez bertaratzeko. Eta eskertuko dute, halaber, aitzurrak eramatea, haurrentzat bereziki.
Kultura berreskuratzeko modu bat ere bai
Biodibertsitatea hobetzeko balioko du auzolanak, anfibio eta narrastiak ugaritzeko. Baina baita kultura berreskuratzeko ere. Antzinako hainbat lan, tresna eta teknika gogoratuko dituzte, ekimenarekin.