Gaur arratsaldean hasiko da Korrika kulturala Hernanin. Korrika gunea inauguratuko dute 18:00etan, pintxopote eta guzti. Andrekaleko 25 zenbakian izango dute lokala, eta bertan egongo da erakusketa bat ere, artista eta artisauen lanekin: margolanak, zeramika, eskultura...
Hernaniko eta inguruko artisten lanak izango dira, ezagunak edo ezezagunak. Izan ere, inguruko artista guztiei egin diete dei, beren obrak jarri eta parte hartzeko.
Obrak, subastan
Lan horiek subastatu egingo dira. Artistak jarriko du hasierako prezioa, eta herritarrek aukera izango dute pujak egiteko, martxoaren 12ra arte. Gehien eskaintzen duenak eskuratuko du lana.
Lokala zabalik egongo da ostegun eta ostiraletan, 18:00etatik 20:00etara; eta larunbatetan, 11:00etatik 13:00etara.
Bertso afarirako, txartelak salgai
Antolatu duten hurrengo ekintza, bertso afaria izango da, otsailaren 6an. Santa Barbara elkartean egingo dute, Aitor Mendiluze eta Maialen Lujanbio bertsolariekin. Txartelak salgai daude Rioja eta Oindi tabernetan, 25 euroan. Gaueko 21:00etan hasiko da, eta menu ederra prestatu dute: urdaiazpikoa, arrain zopa, bakailuz betetako piperrak, txahal-masailak saltsan, gazta tarta, kafea eta kopa.
Beste hamaika ekintza ere izango dira, Korrika kulturalean: arropa desfilea, mus txapelketa, mintzalagun festa...