Ubarburu poligonoko kasuaren harira, Gobernu Taldearen kritikei erantzun dio H1!ek, prentsa ohar bidez: «Pabiloi batzuk eraikitzeko, 2005ean emandako lizentzia bat medio, Bilduk bere balorazioa egin zuen eta aprobetxatu zuen ohi ko kalumniak zuzentzeko eta bere mendeku jarrera azaltzeko oposizioaren eta aurreko Gobernu Taldearen aurka. Bilduk honako adjetiboak zuzentzen dizkigu: zentzugabekeria, hekatonbe ekonomikoa, gehiegikeria urbanistikoak, itolarri ekonomikoa… Eta helburu bakarra, oposizioaren ibilbidea zikintzea da», dio.
Bilduk, lezio etikorik ez duela onartuko esan arren, lezioak ematen jarraituko dutela gaineratu du H1!ek, «partidu honek giza duintasuna zapaltzen jarraitzen duen bitartean, Mikel Zabalaren kasuan argi ikusi den bezala». Eta jarraitu du: «Bilduk dio H1!-EAJk sekulako opariak egin dituztela kalte-ordainekin. Beste behin, Elgopebi kasuaz ari dira, epai guztiak Bilduren iritziaren kontrakoak izan diren arren. Ezker abertzalea bera da ehundaka mila euroko kalte ordainak sortu dituena kasu honen inguruko gestio “txapuzeroa” tarteko, epai horiek argi adierazten duten bezala. Eta ezker abertzale honek ordaindu beharko ditu, herritarron dirua erabiliz, “acción de regreso” prozesuko gastuak».
Gardentasuna ere aipatu du H1!ek: «Gardentasunaz hitz egiten dute harro. Hain gardenak baldin badira, zergatik ez dute udaleko web gunean kasu honen epaia argitaratzen, H1!etik hainbestetan eskatu diegun bezala?».
«Plan Generala erabiltzen ari dira»
Plan Generalaren inguruan ere hitz egin du H1!ek: «Bilduk dio nekatuta eta nazkatuta daudela hainbeste energia eta Udal baliabide gastatu behar izateagatik, H1! eta EAJko Gobernu Taldeek sortutako zentzugabekeria urbanistikoak konpontzen. Hori diote kalumniatan oinarritutako kanpaina bat sortu zutenek H1! Eta EAJren Gobernu Taldeak onartu zuen Plan Generalaren aurka, eta momentu honetan, Plan General hori erabiltzen ari direnak, beraiek ez baitaukate herri eredurik».
Eta gaineratu dute: «Plan General bat onartzeko bai gastatzen direla energia eta udal baliabideak. Bilduk merezi duen Plan Generalen bat onartzen duenean, orduan izango du hitz egiteko aukera herriagatik energia gastatzen duela esanaz eta ez bere kontra, orain egiten duen bezala».
«Udal foroetan parte hartzen dugu»
Honakoa ere kritikatu diote Gobernu Taldeari: «Esaten dute Hamaikabatek eta EAJk saihestu egin nahi dutela, behin eta berriz, oinarrizko eztabaida politikoa Udal foroetan. Oinarririk ez duen beste adierazpen bat da, izan ere, Udal foroetan parte hartzen dugu eta beraiekin eztabaidatzen dugu gai guztien inguruan. Ez duguna egingo da, Bilduk egiten duen Udal instituzioen intrumentalizazio partidistan parte hartu. Bere iruzur politikoen zerbitzura jartzen dituzte Udal instituzioak, irainak, mehatxuak eta derrigortasuna oinarri izanik, adierazpen askatasuna eta pertsonen duintasuna saboteatuz».