Ander Gillenea fotokazetari donostiarrak argazki erakusketa eskainiko du bihar Astigarragan. Gilleneak milaka argazki atera ditu 24 urteko ibilbidean eta horietako batzuk egongo dira ikusgai bihar. Hain zuzen, euskal gatazkari lotutakoak izango dira, 1992tik gaur egunera arte ateratakoak: manifestazioak, atentatuak, hiletak... Gatazkaren ikuspuntu bat erakusten dute argazkiek, Gilleneak dioen bezala, objetiboa izatea ezinezko baita, baina zintzotasunez jokatzen eta ikusitakoa erakusten ahalegintzen da.
Erakusketa hau, 17 urte inguruko gazteentzat oso deigarria eta inpaktantea izaten dela dio.
Bilboko manifestazioa, azken atxiloketak...
200 argazki baino gehiago egongo dira ikusgai eta proiektore batek bilduma zabalagoa erakutsiko du etengabe. Gilleneak Hernanin eskaini zuen erakusketa hau urrian eta ordutik aurrera izandako gertaeretako argazkiak ere ekarriko dituela Astigarragara nabarmendu du: «Bilboko manifestaziokoak, azken atxiloketetakoak...».
Argazkiez gain, prentsa argitalpenak ere izango dira, Euskal Herrikoak eta kanpokoak. Izan ere, Gillenearen argazkiak hainbat egunkaritan argitaratu izan dira: The New York Times, International Herald Tribune, Libération, The Guardian, Berliner Zeitung...
Erakusketa, goiz eta arratsalde
Erakusketa, Astigarragako kultur etxean izango da. Goizean, 10:00etatik 12:00etara izango da eta arratsaldean, 17:30etatik 20:30etara. Gillenea bertan egongo da azalpenak emateko.