Ospakizun ikasturtea dute Urnietako Salesiarrek 2014-2015a. Heziketa etxe gisa 1964ko urriaren 15ean hasi zuten ibilbidea, eta 50 urte hauetan, milaka ikasle, irakasle, laguntzaile etab pasa dira bertatik. Urrian egin zuten irekiera ekitaldia, eta ikasturte osoan zehar dute festa-ekitaldi ezberdinak antolatzeko asmoa.
Krosean izena aurrez emateko aukera dago ‘sailkapenak.com’ helbidean.
Don Bosco krosaren 1go edizioa
Datorren ekitaldia zehaztu dute: krosa, otsailaren 1ean. Don Bosco da Lanbide Heziketako patroia, eta urtarrilaren 31n ospatzen da. Aitzakia perfektua izan da beraz, ikastetxearen bueltan jendea biltzeko. Kros irekia antolatu dute, eta parte hartu nahi duen guztiari luzatu diote gonbitea: «lehendik ere antolatzen genuen kros bat eskolan. Aurten ordea, ezagutzera eman nahi dugu. Parte hartu dezakete ikasleek, irakasleek ikasle ohiek, gurasoek, familiek, laguntzaileek... hau da, salesiarren parte izan diren guztiek. Eta era berean, baita herritarrek ere. Jendea gerturatzea nahi dugu, 50 urteak gurekin ospatzea».
Irekia da: parte hartu dezakete ikasleek, irakasleek, familiek, laguntzaileek, herritarrek...
Ibilbide erosoa, Urnietan barrena
Krosak 7 kilometroko ibilbidea izango du Urnietan barrena: «ibilbide erosoa izango da, herrian barrena. Beraz, edonork parte hartu dezakeela esan liteke». Otsailaren 1ean Salesiarren egoitzatik aterako da krosa, goizeko 11:00etan. Eta helmuga ere, bertan izango du. Bi dira baldintzak: hamabost urtetik gora izatea, eta izena ematea. Aurretik eman nahi dutenek www.sailkapenak.com web orrian edo Salesiarren egoitzako idazkaritzan dute aukera; prezioa, 8 euro. Bestalde, egunean bertan ere izango da aukera goizeko 10:30ak arte; kasu honetan, prezioa 10 eurokoa izango da.
Bi kategoria izango dira: emakumezkoak eta gizonezkoak. Eta sariak, kategoria bakoitzeko aurreneko hiruentzat. Horretaz gain, partehartzaile bakoitzak kamiseta bat jasoko du sari gisa. Eta zozketak ere egingo dira: Ugaldetxo eta Errioguardan otorduak, Esnaleko gozoak...
1000 hernaniar inguruk ikasi dute Salesiarretan
Sorreran ere, hernaniarrak izan ziren tarteko.
MILAKA gipuzkoarrek ikasi dute Urnietako Salesiarren ikastetxean. Sorreran ofizio bat ikasteko lekua bazen ere, azken hamarkadetan DBH eta Batxilergoko klaseak eman dituzte bertan, besteak beste. Inguruko herrietako ikasleentzat tiradizo haundia izan duen ikastetxea da, eta Hernani ez da atzera geratzen horretan. Kalkulatzen da ikastetxeak dituen 50 urteetan 1000 hernaniar inguru pasa direla bertatik, ikasketaren bat egitera. Ikastetxeko klaustroan ere izan dira eta ari dira hernaniarrak lanean.
Sorreran ere, parte
Salesiarren formakuntzarako etxe baten beharra sumatu zuten 1951 urtearen bueltan. Lanak Juan Manuel Beobideren esku utzi zituzten, urteetako harremanaren ondorioz, 1957an gaur egungo lurrak erosi zizkieten Zaragueta-Aristizabal sendiari. Gazteak lanerako formatzea zuen helburu egin nahi zen eskolak, eta Zaragueta-Aristizabal sendiak hasieratik eman zion babesa. Lanak geldituta egon baziren ere, borondatezko ekarpenei esker eraikuntza berria egin zuten, eta 1964ko urriaren 15ean hasi ziren klaseak ematen. Gainerako eraikuntza eta instalazioak gerora egin ziren. Hauek ere, Zaragueta-Aristizabal sendia hernaniarrak eta beste askok egindako ekarpenei esker.