Batzar irekia antolatu du Hernaniko Gure Esku Dagok gaur goizerako. Biteri kultur etxean jarri dute hitzordua, goizeko 11:00etan. Hamaiketako goxo baten ondoren bukatuko dute, eguerdiko 13:00ean.
Hernaniar guztiei dei egin diete batzarrean parte hartu eta ekarpen eta proposamenak egin ditzaten.
Udaberri Festa Hernanin; ekitaldi erraldoiak Euskal Herrian
Batzarrean iraganari eta etorkizunari begiratuko diote.
Aurrena, orain arte egindakoari eta diru-kontuei gainbegiratu bat ematea da asmoa.
Ondoren, datozen hilabetetarako Gure Esku Dagok antolatu dituen ekintzen berri emango dute.
Batetik, Udaberri Festari eutsiko diote; apirila bukaera aldera egingo da. Bestetik, Euskal Herri mailan ekitaldi erraldoiak antolatuko dituzte; hiriburuetako estadioetan egingo dira, ekainaren 20an. Bi ekimenak lotuta egongo dira aurten.
«Ekimen partehartzaileak izango dira, inoiz baino gehiago. Horrenbestez, ahalik eta hernaniar gehienon prestutasuna eta konpromisoa ezinbestekoak izango dira», azaldu dute. «Guztion lana beharrezkoa da erabakitzeko eskubidea gauza dezagun».