Aurrez aurre, hortzak erakutsiz jokatu zuen atzo Hernanik, Cisnerosen kontrako partidua. Zelaian ez zen sailkapenean dagoen alderik ikusi, nahiz eta azken emaitza madrildarren aldekoa izan zen: 7-11. Neguko partidua jokatu zen atzo Landaren. Zelaia zaila zegoen, pisutsu. Defentsan ondo aritu ziren bi taldeak, baina erasorako zailtasun asko izan zituzten. 29garren minutuan madrildarrak jarri ziren aurretik, zigor kolpe baten ondorioz: 0-3. Hernanik entsaio ikusgarri batekin erantzun zion Cisnerosi, Genuak egina eta gauzatua. Atsedenaldian 7-3 aurretik ziren trikoloreak.
Epailea protagonista
Bigarren zatia antzeko hasi zen. Zelaian berdintasuna, eta meleetan, trikoloreak finago. 54 minutuan bigarren zigor kolpea lortu zuen Cisnerosek, eta markagailuan gerturatu egin zen, 7-6ra. Eta handik aurrera, errugbi taldeak baino gehiago, arbitroa izan zen protagonista. Hernaniko jokalari bat kanporatu zuen, eta hutsune hori aprobetxatu zuen Cisnerosek entsaioa egin eta 7-11 aurreratzeko.
Hernanik ez zuen amore eman, eta ahaleginak egin zituen markagailuari buelta emateko. Arbitroak ordea, nahikoa oztopo jarri zituen, partidua eten eta trikoloreen jokoa gelditzeko.
CRC Pozueloren kontra, igandean
Atzoko partidua atzean utzi eta datorren asteburuan du burua Hernanik. CRC Pozueloren kontra jokatu du etxetik kanpo, igandean, 13:00etan.