Eusko Jaurlaritzak ireki du 2015eko dirulaguntzak eskatzeko epea. Azaldu dutenez, dirua banatzeko erabiliko dituzten irizpideak 2014ko berdinak izango dira eta banaketa sistema hartuko dute kontuan, irakurtzen den edo ez neurtzeko. Kronikari %20 jaitsi zion dirulaguntza Jaurlaritzak joan den urtean, eta aurten ere, berdina gertatu liteke. Hori horrela, Kronikak sinadura bilketa jarri du martxan.
Nola baloratzen du Jaurlaritzak banaketa?
Balorazioa egiterako garaian, Eusko Jaurlaritzak lau modutara neurtzen du irismena. Puntuazio altuena jasotzen dute harpidetza ordainduaren sistema erabiltzen dutenek. Bigarren mailan daude, debaldeko bazkideei banatzen dieten hedabideak. Hirugarren postuan daude, harpidetzarik gabe, etxez etxe banatzen duten hedabideak. Eta azken postuan daude, banaketa masiboa egiten duten komunikabideak. Azkeneko honetan sartzen dute Kronika. Izan ere, Kronika ez da banatzen, hartu egiten du herritarrak.
Jaurlaritzaren arabera, 300 ale eskas, egunean
Kronikak 4.000 aleko tirada du, egunero. Jaurlaritzaren irizpideen arabera ordea, egunero 300 ale eskas banatzen direla estimatzen du. Hori horrela, dirulaguntza %20 murriztu zitzaion Kronikari 2014an eta aurten gauza bera gertatu liteke.
Firma bilketa, debaldeko bazkideak lortzeko
Kronikak argi ikusi du irizpide hauek ez dutela errealitatea erakusten. Bat dator irismenari ematen zaion garrantziarekin, baina ez neurtzeko moduarekin. Hori argitze aldera, Eusko Jaurlaritzarekin harremanetan jarraitzen du.
2015eko deialdia, ordea, zabalik da eta aldaketarako marjen gutxi dago. Egoerari aurre hartu, eta Kronikak firma bilketa jarri du martxan. Sinadura bilketarekin erakutsi nahi da Kronika iritsi egiten dela herritarrengana eta irakurri egiten dela.
Erronka: 5.000 sinadura
Herriko taberna, elkarte, okindegi, kiosko eta abarretan daude sinatzeko orriak. Bertan sinatzen duten herritarrek onartzen dute Kronika jaso eta irakurri egiten dutela, eta harpidedun/bazkide egiten direla, debalde. Bete beharreko datuak dira: izen-abizenak, nortasun agiria, non jasotzen den Kronika, herria eta sinadura.
Kronikak erronka jarri du, 5.000 sinadura baietz! Egunero 4.000 aleko tirada du, eta Ikertalderen arabera, %75etik gora euskaldunek irakurtzen dute egunero Kronika; eta erdaldunen %53k.
Sinadura orriak, eskuragarri
Kronika lagundu, eta koadrilan, lanean, etxean... firmak bildu nahi dituenari orriak emango zaizkio.
Horretarako hiru aukera daude: orria www.kronika.eus webgunetik deskargatzea; kronika@kronika.eus helbidean eskatzea, edo Larramendi 11 beheko lokaletik pasatzea. Firma bilketa 15 egunez egingo da, hau da, urtarrilaren 31 arte.