Astigarraga, Lezo eta Oiartzungo giza proba taldea da Emarri, eta ate-irekiak antolatu dituzte, nahi duen guztiak harri-tiran ibiltzea zer den jakiteko. Haizan/k, harri tiran ibili al haiz noizbait? Ez hitz egin probatu gabe!
Aurreneko ate-ireki saioa gaur egingo da, goizeko 10:30etan hasita, goiko plazan. Datorren astean beste saio bat ere antolatu dute, hilaren 24an, Oiartzungo Karrika auzoko probalekuan, 10:30etan baita ere.
«Aukera polita da kirol honekiko aurreiritziak alboratzeko». Emakume eta gizonentzako irekiak dira jardunaldiak.
Entrenamenduetara azaltzeko aukera
Ate-ireki saioetara azaldu ezin dutenek, entrenamenduetara azaltzeko aukera ere badutela azaldu du Emarrik. Astean zehar elkartzen dira, eta bertaratzeko harremanetan jartzeko eskatu dute, helbide honetara idatzita: emarritaldea@gmail.com.
Urteko aurreneko plaza, bihar
Bestalde, Emarrik bihar izango du urteko aurreneko plaza. Zeaniko Andra Proba taldearen kontra ariko dira, 12:30etan, Itziarren. Iaz, 18 plaza egin zituen Emarrik.