Gaur bukatuko dute aurreneko itzulia, Euskal bigarren mailako bi talde astigartarrek. Etxean jokatuko dute neskek, 16:00etan, Barakaldoko Ausartaren kontra; mutilek, berriz, Cafes Aitonaren kantxa bisitatuko dute, Gaskan, 20:00etan. Garaipena bilatuko dute Mundarro-La Salleko bi taldeek, ligako aurreneko itzulia borobildu, eta bigarrena gogoz hasteko.
Oso desberdinak izan dira, orain arte, bi taldeen sasoiak. «Sailkapenaren erdialdean goaz, eta igo berria den talde batentzat, oso positiboa da hori», dio Aitor Lopezek, nesken entrenatzaileak. «Oso irregular aritu gara, partidu batzuetan lehiatu gabe, eta bestetan dominatu ditugun partiduak galduz. Baina buelta eman diogu horri, azken asteotan», azaldu du German Ceak, mutilen taldeko entrenatzaileak.
Lesioak eta galdutako jokalariak, oztopo
Bide onetik doaz une honetan, baina oztopo ugari izan dituzte bidean. Mutilek, baja garrantzitsu batekin hasi zuten denboraldi berria: «azken urteetako base titularra galdu genuen, eta ez da erraza aldaketara egokitzea».
Neskek, ordea, lesioekin izan dituzte arazoak: «10 jokalarirekin hasi ginen, oso justu, eta Sara Vitores lesionatu zen, denboraldi osorako. Orain, Itsaso Portelak hartu du min belaunean, eta ez dakigu noiz itzuliko den».
Mailari eustea, bideratuta
Mailari eustea dute aurreneko helburua, eta nahiko bideratuta daukate lortzea: «igo berriak gara, eta mantentzea da helburua, noski. Pentsatu dugu aspirazio haundiagoetan, baina errealistak izan behar dugu», azaldu du Lopezek.
Gorago ere begiratu nahi du Ceak, bere aldetik: «salbatzea eskura daukagu, eta bosgarren postuari begiratu behar diogu, Final Fourra jokatzeko. Borrokan sartuz gero, lehiakorragoak izango gara. Taldeen arteko aldeak txikiak dira, eta edozeini irabaztea posible da».
Hobetu beharrekoak: defentsa mutilek, erasoa neskek
Hobetzen jarraitzea ere badute helburu, Lopezek eta Ceak. Baina indargune eta ahulgune ezberdinak ikusten dizkiete, bere jokalariei: «defentsan lan ona egiten ari gara, baina eraso sistemak lantzea eta hobetzea falta zaigu. Zaila da, ordea, entrenamenduetan hain jokalari gutxi izanda», azaldu du Aitor Lopezek.
Defentsan ikusten du traba nagusia German Ceak: «defentsako intentsitatea eta errebotea hobetu behar ditugu. Daukagun altueragatik, dominatu egin behar dugu saskipean».
«Salbatzea eskura daukagu; bosgarren postuari begiratu behar diogu», dio German Ceak.
Sorpresa gaurko partiduan: Paula Pozoren itzulera
Momentu onari eutsi nahi diote bi taldeek, denboraldi bukaerara arte. «Talde gaztea da, eta ez zaigu luzea egin behar», dio Lopezek. «Azken asteetako ratxa mantendu behar dugu, eta bigarren itzulia hobea egin», uste du Ceak.
«Ezusteko txiki bat daukagu gaurkoan: Paula Pozoren itzulera», aurreratu du Aitor Lopezek.
Gaurkoa dute aurreneko aukera, garaipenaren bidetik ekiteko. Eta nesken kasuan, sorpresa eta guzti. «Ezusteko txiki bat daukagu partidu honetarako: Paula Pozo astigartarra berriz arituko da gurekin jokatzen, udan taldea utzi ondoren», aurreratu du Aitor Lopezek.