Olatz Aiestaran eta Idurre Aierdi Astigarragako Kale Hezitzaileak dira. Haur, nerabe eta familiekin egiten dute lan, heziketaren arloan, eta preben­tzioa ere lantzen dute herri mailan. Herrian ikusten diren beharrak azter­tzen dituzte eta horien aurrean ze landu zehazten dute. 6-12 urteko haurrekin zuzeneko tratua dute eta 12-18 urtekoekin Gazte Lekuaren bidez betetzen dute funtzio hori. 
Aierdi Kale Hezitzailea izateaz gain, Gazte Lekuko arduraduna da. Eta Aiestaran, Gazte Lekuko koordinatzailea da eta Gazte Informazio Bulegoko arduraduna. Gazte Lekuan, beraiez gain, 3 hezitzaile daude eta laguntzaile funtzioa duen beste pertsona bat. 
«Kale heziketari dagokionez, guk, Kale Hezitzaileok osatzen dugu herrian aurrera eramango dugun programa. Eta Gazte Lokalean ere bai. Haur eta nerabe prebentzio bilkura ere badago. Bertan lan­tzen dugu herrian zer egin daitekeen  prebentzio aldetik. Agente desberdinak gaude bertan: ikastola, zinego­tziak, udaltzainak, guraso elkar­tea… Horrez gain, parte hartzen dugu herriko batzorde desberdinetan: Prebentzio Bil­ku­ran, Berdintasun Batzordean eta Jai Batzordean. Nerabeen ikuspuntua lantzen dugu horrela», azaldu dute bi hezitzaileek.
Bultzatu izan dituzten ekin­tza desberdinak eta landu izan di­tuz­ten gaiak ere nabarmendu dituz­te: giza abilezien tailerra, arra­zakeria, jostailu bilketa, txo­txolo kanpaina alkoholaren kon­tsumo arduratsua bultzatuz (Gazte Lekuan eta herri mailan)...
Kale Hezitzaileen figura 2004tik dago Astigarragan, eta urteetan zehar aldatzen eta garai berrietara egokitzen joan da. Udalak sortu zuen eta gizarte zerbitzuetatik gestionatzen da.

«Jolas Berri programa ere 
irekia da, 6-12 urteko edozein umek hartu 
dezake parte»

Jolas Berri programa, aberasgarria
6-12 ur­teko haurrei zuzenduta, Jo­las Berri programa eskain­tzen du­te Kale Hezitzaileek. Arrobitxulon daukate lo­ka­la. Irekia dela azpi­ma­rratu dute bi hezitzaileek: «Gure eskaintza aisialdi hezitzailea da eta edozein umek hartu dezake parte programa honetan. Eta asko dira etortzen direnak. Gure ustez, aisialdiaren bidez hezi daiteke eta hori da egiten duguna. Ondo pasatzen dute eta era berean heziketa ere lantzen dugu. Adin desberdinetako umeak el­kar­tzen dira, neska eta mutilak... oso harreman polita lor­tzen dute eta oso aberasgarria da. Adin diferen­tzia ez da notatzen eta gainera, oso ona da adin ezberdinekoak harremantzea».

«Gazte Lekuan, ez diegu ematen dena egina,
beraiek sortu dezatela eta parte hartu dezatela bultzatu nahi dugu»

Astelehen eta asteazkenetan
Astean bitan izaten da Jolas Berri: Astelehen eta asteazkenetan (16:30-18:30). Funtziona­men­dua, honakoa da: meriendatu eta etxeko lanak eginez hasten dute arratsaldea. Eta etxeko lanak ez dauzkatenek jolastu egiten dute. Ordubete inguru izaten da hori, eta ondorengo ordubetean, programatutako ekintzaren bat egiten dute denen artean: pelikulak ikusi, sukaldean aritu, tailerrak, pintxo lehiaketak…».
Programa honetan, 20tik go­ra ume elkartzen dira. Dena de­la, muga bat dute: 25 ume. «Bes­tela ezin gara behar bezala iri­tsi», diote. Azken urteetan gero eta haur gehiago apuntatzen direla azaldu dute: «Heziketari begira, lan haundia egiten ari dira alderdi guztietatik, ikastolatik, gizarte zerbitzuetatik... Zentzu onean ari gara lanean». 

Gazte Lekua: nerabeentzako eta nerabeek sortua
12-18 urte bitarteko haurrei zuzendua da Gazte Lekua. Joseba Barandiaran plazan dago lokala eta asteartetik igandera izaten da (17:00-20:00). Asteartetik ostiralera Lagunki egiten dute. Hau da, egun horietan librea izaten da eta bertan dauden baliabideak erabiltzen dituzte modu librean. Astebu­rue­tan, berriz, ekintza desberdinak egiten dituzte: tailerrak, kirola, irteerak, sukaldaritza eta pelikulak. Horrez gain, Gabone­tan eta udaran, gazteen opor garai­an, ekintza desberdinak antola­tzen dituzte. Eta ordutegia aldatu egiten da. Udan, adibidez, goizez izaten da. Lokalean, gune desberdinak dauzkate: sukaldea (gainera berria da), tailerrentzako gunea, sofagunea, ordenagailuena eta jolasena: ping-pong, bilarra, futbolina eta air hockeya.
Aiestaran eta Aierdi hezi­tzaileek argi dute zer den Gazte Lekua: «Nerabeentzako eta nerabeek sortua. Filosofia horri eusten dio. Ez diegu ematen dena egina, beraiek sortu dezatela eta parte hartu dezatela bultzatu nahi dugu. Eta kontuan hartzen ditugu nerabezaroak dauzkan ezaugarriak».

«Gure ekintza guztietan
helburua beti da heziketa»

Hezitzaileak, konfiantzazko helduak
Gazte Lekuak urte asko daramazki Astigarragan. 2000-2001 inguruan sortu zen, eta ondorioz, herrian errotuta dagoela azpimarratu dute Aiestaran eta Aierdik: «Gaz­teentzat erreferentzia puntu bat da biltzeko». Astean zehar 20 bat gazte elkar­tzen dira bertan eta asteburuetan 50 bat izaten omen dira (denboraldiaren arabera, azterketa garaian gutxiago).
Hainbat lekutan egon da urte guzti hauetan: frontoi az­pi­ko lokalean, Ergobin, Ki­rol­de­gian... Urte gehienak, eta azkenak, Joseba Baran­diaran plazan egin ditu. Toki aldetik oso ondo dagoela diote bi hezitzaileek, baina pixka bat zaharkitua dagoela. 
Gazte Lekuko arduraduna eta koordinatzailea dira be­raiek eta eguneroko martxarako, beste hiru hezitzaile daude: La­rraitz, Maider eta Gorka.  «Hezi­tzaileak konfiantza ematen du­ten heldu batzuk dira, ez dira ez guraso ez irakasle. Tarteko zerbait dira eta gazteek eskertzen dute. Komu­nikazioa lantzeko modu egokia da», diote. Eta gaineratu dute: «Gure ekintza guztien helburua beti da heziketa. Programek, ekin­tzek... beti dute helburu pedagogikoa. Aisial­dian hezi daiteke; hori argi dugu». Herrian egiten diren ekintza eta jaialdietan ere parte hartze du­tela azaldu dute: «Oso ga­rran­tzitsua irudi­tzen zaigu. Eta he­rriko baliabideak ere erabiltzen ditugu: kiroldegia, frontoia...».
Astigarragako Udaleko web orrian zintzilikatzen dute hilabeteroko egitaraua.

Dokumentala, gaur
Euskal Herriko altxorretan ba­rrena dokumentala emango du­te gaur Gazte Lekuan. Ar­kaitz Astiazaran 30 urteko gipuzkoarrak 4.400 kilometro egin zituen apirilaren 7an hasi eta ekainaren 23ra bitarte Eus­kal Herrian barrena, bizikletaz, eta abentura iruditan bildu ostean, 50 minutuko doku­men­tala osatu du. Bihar, be­rriz, eskulanak egingo dituzte.

Gazte informazio bulegoa

Bekak, lana, oposaketak... gazteen intereseko 
informazioa, eskura

Gazte Informazio Bulegoa KZ Gunean dago. Ordutegia, honakoa da: astearte, ostegun eta ostiraletan, 11:00etatik 13:00etara, eta asteartetan, 17:30etatik 19:30etara.

Astigarragan, Gazte Informazio Bulegoa dago. KZ Gunean dago (Tomas Alba, 13), hain zuzen. Bereziki gazteen interesekoak diren gai orokorrei buruzko informazioa eskaintzen da (bekak, lana, oposizioak, ikasketak, bidaiak, aisialdia...) eta gai espezifiko edo zehatzei buruzkoa ere eskatu daiteke. Ordenagailuak daude bertan eta edozein zalantza argitzeko dago Olatz Aiestaran. Horrez gain, txartel desberdinak egin litezke: Aterpekide Txartela, Gazte Txartela, Ikasle Txartela, Irakasle Txartela...
Ordutegia: Astearte, ostegun eta ostiraletan, 11:00etatik 13:00etara, eta asteartetan, 17:30e­tatik 19:30e­ta­­ra. Eta harremanetan jartzeko: gazteinfor@astigarraga.net edo 690 010 823. 
Ostiraletan, boletin elektronikoa ere argitaratzen du Aiestaranek. Harpi­dedunei bidaltzen die korreo elektronikoz. Astigarraga atala dauka eta bertan herriko ekintzak eta eskaintzak azaltzen dira. Ondoren, Gipuzkoa osokoak. Har­pi­detza egiteko: www.gipuzkoangazte.info. 
Bestalde, KZ Gunean dagoenez, zerbitzu horren funtzioak ere betetzen ditu modu batean eta 30 urtetik gorakoak ere joaten dira ordenagailuak erabiltzera. Bide batez, gogorarazi, hilabetean bitan, KZ Guneko dinamizatzailea bertaratzen dela.