Hasi dira merkealdiak, herriko dendetan ere: «Gabonak pasata, jendea zain egoten da», diote. Fuerte hasi eta lasaituz joaten da kanpaina, baina eguraldiak markatzen ditu gorabeherak: hotza eta euria egiten badu, beraiei mesede; epelduz gero, gutxiago salduko dute. Mahuka eta Urrats dendekin hitz egin du Kronikak, merkealdien hasiera nolakoa izan den ezagutzeko.
«Dena daukagu %40ko beherapenarekin,
eta oso ondo hasi gara»
Oso ondo hasi dira merkealdiak, Mahuka dendan: «aurreneko 4-5 egunak oso onak izaten dira, eta jendea gogoarekin etorri da», azaldu du Nagore Alvarezek. Aurten, gainera, deskontu haundiak egin dituzte: «dena daukagu %40ko beherapenarekin, gerrikoak eta pitxiak izan ezik».
Txamarrak eta jertse lodiak saldu zituzten asko, aurreneko astean, hotza egin zuelako oraindik. Egun hauetan, aldiz, epeldu duenez, blusak eta kamisetak saldu dira ondo.
«Iaz baino hobeto doa, baina ez da izan kolpe ikaragarria»
Urrats zapatadendan, berriz, ez dira hainbeste nabaritu merkealdiak: «Iaz baino hobeto hasi da, eta beti saltzen da gehiago, baina ez da izan kolpe ikaragarria, Gabonetan ere bazeudelako deskontuak», kontatu du Pello Etxebestek.
Modako oinetakoak dauzkate deskontuan, %20an. Eguraldiaren menpe daude, ordea: «euria egiten badu, saltzen dugu; baina hego-haize honekin, zer erosiko dute... sandaliak besterik ez!», dio brometan.