aurten, ETBko Eguraldia saioko lan taldea omenduta, ezin ba eguraldi txarra egin. Eta halaxe gertatu zen. Goizeko zaparradak eta lainoak desagertu egin ziren Ana Urrutia eta Andoni Aizpuru Plazan azaltzearekin. «Eguraldi ona gordea genuen», azaldu zuen umorean Aizpuruk. Oroigarri bat jaso zuten Txotx Batzordearen eskutik, eta eskerrak eman zituzten lan taldearen izenean. Urrutiak aitortza ere egin zuen: «lehenengo aldia da Hernanira etortzen naizela eta lehenengo aldiz joango naiz sagardotegi batera». Sorgin xamarra dela esan, eta Hernani eta bere sagardoa bedeinkatu zituen. Oholtzatik jaitsi eta aurtengo sagardo berria probatu zuten bi gonbidatuek. Oso ona dagoela aitortu zuten, sagardogileen esana baieztatuz. Herritarrek ere izan zuten probatzeko aukera. Eta atzo ezin izan zutenek, maiatzera bitarte izango dute aukera sagardotegietan.
Ekitaldian, Luis Intxauspe alkateak ere hartu zuen hitza eta gogorarazi zuen Udalak lanketa berezia egingo duela eraso sexistarik izan ez dadin, besteak beste: «Errespetuz, goza dezagun txotx denboraldiaz!». Egun osoko festa izan zen atzo, trikitilari, dantzari, kantari, erromeri... eta guzti.