Koxka elkartea eta Udalaren elkarlanari esker, hainbat neurri hartu dira Kiroldegian, berau, denok erabiltzeko moduan jartzeko. Hala azaldu du Koxkak: «Hernaniko Kiroldegiak 25 urtetik gora dauzka. Urte horietan, obrarik egin ez denez, jende ugari da Kiroldegia erabili ezinean. Halaxe adierazi zuten 2013ko prozesuan parte hartu zuten askok eta askok».
Udalarekin egindako elkarlanari esker (Zerbitzu Publiko eta Kirol Zerbitzuak), honako mejorak egin direla nabarmendu du: «igerilekura iristeko ate automatikoa; uretan sartzeko grua; dutxa bat eta bi komun egokitzea; desgaitasun jakin bat dutenentzako aulki bat jartzea, aldageletatik igerilekura joateko; aldagela bat egokitzea, kamila eta telefono-dutxarekin; eserleku erosoagoak jartzea, umeen aldageletan. Azkenik, ate automatikoak jarriko dira, hurrengo batean, Kiroldegiaren bi sarreretan».
Arauak, desgaitasunen bat dutenen mesedetan
Obra horiei, beste batzuek jarraitu beharko dietela gaineratu du eta zenbait arau jarri beharko direla ere bai, «desgaitasuna duten pertsonen mesedetan. Alegia, nola erabili material berezia, zein kale gorde behar zaien igerilekuan, edo nola erabili aldagelak zaintzaile bat sartzen bada».
Arau horiek Koxka eta Kirol Zerbitzuaren artean egin direla azaldu du eta Kiroldegian bertan ikusgai daude. Baita zein ordutan erabiliko duten ere igerileku txikia desgaitasuna duten pertsonek. Informazio hori Koxka elkarteak bere bazkide guztiei bidaliko die, baita informazio hori eskatzen duen edonori ere.
Materiala lapurtu edo puskatzea, salatu
Hainbat portaera ere salatu ditu Koxkak: «Inbertsioek ez dute ezertarako balio, materiala lapurtu edo nahita puskatzen bada. Koxka elkarteak publikoki salatu zuen, bere garaian, nola lapurtu zuten dutxa-alkatxofa egokitu bat, jarri berria; eta, nola azaldu ziren txikituta bai komun egokitua eta bai dutxa-barra berri-berria. Horrelako portaerek, bataz, zaildu egiten dute Kiroldegia denok erabil dezagun; eta, besteaz, diru publikoa (denon dirua) xahutu besterik ez dute egiten».