Plax! sexu eta bikote aholkularitza zerbitzua aurkeztu zuten atzo Udal ordezkariek, Plax!eko arduradunek eta Hernaniko Osasun Zentroko ordezkariek. Luis Intxauspe alkateak zerbitzuaren garrantzia eta elkarlana azpimarratu zituen.
Nerea Sancho eta Axier Baglietto dira Plax! aholkularitzako arduradunak. Zerbitzu honek nola funtzionatuko duen azaldu zuen Sanchok: «sexualitatea eta bikote harremanak landuko ditugu, eta helduengana iritsi nahi dugu. 30, 40, 80... urterekin ere bizi dugu sexualitatea. Gure ibilbide biografikoa aldatzen doa, etapa desberdinak dauzkagu: seme-alabak eduki, dibortziatu... Baina etapa batetik bestera aldatzerakoan, askotan ez dakigu pausoa nola eman. Umeak eduki nahi ditut, baina sarketan min hartzen dut. Zer egin dezaket? Isurketa atzeratu nahiko nuke, baina ez dakit nola kontrolatu...». Zailtasun horiei guztiei emango diete bide. Diptiko batzuk zabalduko dituzte herrian zehar eta 18 egoera zehatz aukeratu dituzte, baina edozein zalantzaren inguruan galdetu daitekeela azaldu dute.
Lehenengo kontsulta, larunbatean
Aholkularitza gune profesionala eta doakoa izango da. Ongintzan egongo da bulegoa, Gizarte Zerbitzuetan. Hilean bi zerbitzu izango dira: larunbat goiz batean (10:00-13:00) eta ostegun arratsalde batean (15:30-18:30). Eta lehenengo kontsulta, larunbat honetan bertan egiteko aukera izango da. Aurrez aurreko kontsulta egin daiteke edo mezu bidezkoa. Eta aurrez aurrekorako, hitzordua telefonoz hartu daiteke edo egunean bertan bulegora azaldu.
Herritarrei animatzeko dei egin zien Sanchok, «bizitza erotiko alaiagoa izateko. Bizitzako arlo guztietan dauzkagu zailtasunak edo helburuak. Sexualitatean ere berdin berdin. Gainera, zailtasunak, normalean, ez dira ez fisiologikoak, ez psikologikoak. Sexualitatea ikasten den zerbait da». Eta beraien esperientzian oinarrituta, ziurtasunez hitz egin dezaketela nabarmendu zuen.
Harremanetarako eta informazio gehiagorako: 656 544 606 telefonoan, eta Facebooken, www.facebook.com/plaxherna.