Gertuko baten heriotzak dakarren dolua, lehen pertsonan jasoko dute hernaniarrek, datorren astelehenean. Aulki hutsak dokumentala emango dute Biterin, 19:00etan. Sarrera librea izango da, baina lekuak mugatuak dira. Bidegin Doluaren Laguntzarako elkarteak antolatu du emanaldia, Dolubidetik zikloaren barruan, Hernaniko Udalaren eta Ongintza Patronatuaren laguntzaz.
Heriotzaren osteko doluaren testigantzak
Iñaki Peña medikuaren lana da dokumentala, eta bertan jasotzen ditu heriotzaren ondorengo dolu-garaia bizi izan duten zenbait pertsonen testigantzak. Dokumentala euskeraz izango da, eta gaztelaniazko azpitituluekin emango dute.
Bi guraso hernaniarren dolua
Dokumentalaren ondoren, solasaldia izango da Izaskun Andonegi Bidegineko presidentearekin, eta Ion Andoni Martinezekin.
Iraitz semea galdu zuten Ion Andoni eta Bega guraso hernaniarrek duela bi urte, eta dolu garai gogorra bizi dute. Beraiek bizitako mina egongo da islatuta Aulki hutsak dokumentalean.