Ur mozketen gaia jarri dute berriro mahai gainean, Hernaniko Udalean; Zerbitzu Publikoen Batzordean landu zuten, abenduaren 18an. Batzordearen bilera horretan, «Bilduk atzera bota zituen bi emendakin, bat PSE-EErena eta bestea Hamaikabatena», azaldu du Hernaniko alderdi sozialistak.
Horregatik, ur mozketetarako protokolo bat egitea eskatu du PSE-EEk: «Bilduk ez dituenez arautegian sartu nahi guk emendakinean aipatutako kontuak, Udalean eskatu dugu protokolo bat egiteko».
PSE-EE: «Ur mozketen berri emateko, idatzizko informazioaz gain, grafikoa ere eman behar da».
Teknologia berriak erabiltzeko proposamena
PSE-EEk aurkeztutako emendakinean, teknologia berriak erabiltzea eskatu zuten, ur mozketaren bat izango zenean, herritarrei jakinarazteko. Halaber, adierazi zuten zehaztu beharra zegoela, araudi berrian, zein komunikabidetan eta zein tokitan emango zen mozketaren berri, eta baita bandoak jarri behar ziren ere.
Idatzizko informazioz gain, grafikoa ere bai
Sozialistek azpimarratu dute, gainera, ur mozketen inguruko informazioa ezin dela idatzizkoa bakarrik izan: «grafikoa ere izan behar du».
Jarraibide guzti horiekin, lortu nahi dute ez errepikatzea azkeneko ur mozketako informazio falta.