2015eko Udal aurrekontuaren zirriborroa prest dago eta orain Udalak auzoetara eramango du, bertan aurkeztu eta auzotarrek ekarpenak egiteko aukera izan dezaten. Aurrekontuaren zirriborroa asteazkenean (urtarrilak 7) pasako da Ogasun Batzordetik eta 9an hasiko da bilera erronda. Zortzi bilera izango dira guztira urtarrilaren 20ra arte, eta urtarrilaren 26ko Ogasun Batzordean aurkeztuko dira bilera horietan jasotako proposamen eta ekarpenak, eta alderdi politikoek egindako emendakinak. Ondoren, Udal aurrekontu proposamena Plenora bideratuko da behin behineko onarpena emateko.
Udaletik jakinarazi dutenez, bilera erronda honekin martxan jarriko da parte hartze ordenantza, nahiz eta oraindik behin betiko onarpenaren zain egon.
Aurrekontu partehartzaileak
Bilera sorta bukatuta, Aurrekontu Parte Hartzaileen ekimena abiatuko du Udalak, iaz egin zuen bezala. Ekimen honetan, herritarrei aukera emango zaie Udal aurrekontuetako inbertsioetako partidako diru kopuru bat zuzenean proiektu batera bideratzeko. Ekimen hau ere parte hartze ordenantzaren barruan aurreikusita dago.