Urte Berriari ongi etorria emateko, kontzertu berezia antolatu du Goiz Eguzkik, bihar. Milagrosan izango da, iluntzeko 19:00etan, eta hiru talde ariko dira: Hernaniko Otxotea, Virgil eta Julian bikotea, eta Goiz Eguzki abesbatza.
Guztira, hamaika abesti kantatu eta joko dituzte, batzuk banaka, eta beste batzuk denek batera.
Hernaniko Otxoteak, bosgarren urteurrena
Bere bosgarren urteurrena du Hernaniko Otxoteak. Duela 5 urte sortu zen, baina bere ibilbideak bi urte bakarrik iraun zuen. Orain taldean daudenek, baina, urteurrena ospatuko dute 2015ean zehar, biharko kontzertuarekin hasi eta San Joanetako Preludioarekin segita. Hain justu, beraiek kantatuko dute aurrena, bihar. Festara abestuz irekiko dute kontzertua.
Goiz Eguzki abesbatzak emango dio jarraipena, eta lau abesti kantatuko ditu, tartean gabon kanta errumaniar bat.
Transilvaniako folklorea ezagutzeko aukera
Errumaniakoak dira, hain justu, Virgil eta Julian. Kale musikariak dira, Transilvaniatik Hernani eta Urnietara etorriak, eta hango folklorea ekarriko dute Milagrosara. Gainera, Goiz Eguzki abesbatzari lagunduko diote, Imanol Kamio eta Endika Zubeldiarekin.