Eskualdeko preso gaixo larrien sostegu plataformak prentsaurrekoa eman zuen larunbatean, Hernanin. Preso gaixoak etxeratzeko, konpromisoak hartu eta dinamika ezberdinetan parte hartzeko garai dela adierazi zuten: «Sasi guztien gainetik, gatazkaren konponbiderantz, Euskal Herriaren elkarbizitza demokratikorantz, inoiz baino beharrezkoago dugu espetxe politika honen zutabe diren salbuespen neurriak etetea eta gaixo dauden presoak etxera ekartzea. Eta horretarako noski, denon indarra beharrezkoa da. Jada ditugun dinamikak hauspotu eta berriak sortzeko garaia da, preso gaixoen etxeratzearen aldeko dinamika etengabea sortzeko garaia da».
Urtarrilaren 10ean, Bilbora
Euskal Herriko ia 500 preso politikoak eta gaixotasun larriak dituzten 10 presoak gogoan izan zituzten. Bereziki, eskualdeko Gari Arruarte hernaniarra eta Ibon Fernandez lasartearra: «Hemen gaudenok, konpromisoa adierazten dugu dinamika anitzak elikatu eta sustatzeko, Ibon eta Gari eta beste presoak etxera ekartzeko. Hori horrela, bat egiten dugu urtarrilaren 10ean Bilbon egingo den mobilizazio erraldoiarekin eta Buruntzaldeko herri ezberdinetan egingo diren dinamika ezberdinekin».
Eta herritarrei ere dei egiten diete: «Denok gara beharrezkoak, zu, ni eta hura, zuek, gu eta haiek. Guztion ekinez: Ibon, Gari eta beste preso gaixoak etxera! Salbuespen neurriak eten!».