Urte Berrian sartzearekin batera, koheteak bota ohi dituzte zenbait herritarrek, eta horien inguruan kezkatuta azaldu da Kaxko Elkartea: «bizilagunak kezkatuta daude, modan jarri den koheteak botatzeko ohitura arriskutsuarekin, Urte Berrian sartzean».
Etxe zaharretan, suteak gertatzea oso erraza dela gogoratu dute, 2013an Bermeon eta iaz Trintxerpen gertatu zen bezala. Horregatik, Hernaniko Udalari eskatu diote neurriak hartu eta kontzientziazio kanpaina bat egiteko.
«Pentsatu bi aldiz, koheteak bota baino lehen»
Praktika arriskutsua dela eta, kontuz ibiltzeko dei egin diete, koheteak botatzeko asmoa dutenei: «pentsatu bi aldiz, etxeak dauden guneetan koheteak bota baino lehen, bizilagunen eta etxebizitzen segurtasuna bermatzeko, eta legedia betetzeko».
Izan ere, koheteak botatzean akatsen bat eginez gero, azaldu dute jende askok jasan dezakela kaltea: «botatzen dituzten pertsonek, gehienek ez baitute beharrezko prestakuntza; beste pertsona batzuk, lesioren bat izan dezaketenak; eta etxebizitza zaharrak, egurrezkoak izan ohi direnak, eta beraz, sute bat errazago izan dezaketenak».
Bide batez, Kaxko Elkarteak jai zoriontsuak opa dizkie herritarrei, Kaxkoa garbiago eta istilurik gabe egongo delakoan, Urte Berriarekin.