Fernando Amezketarra jaio zela 250 urte bete dira aurten, eta hori aprobetxatuz, emanaldi berezia osatu dute Eñaut Agirrek, Imanol Kamiok eta Aitor Atxegak: «urteurrena aprobetxatuz, bazen garaia omenaldi bat egiteko, ezagutzen den aurreneko bertsolari belaunaldiari». Biterin eskainiko dute gaur, 19:00etan. Sarrerak, 5 euroan jarriko dituzte salgai.
Garai hartako 60 bertso inguru bildu, eta ordu eta erdiko saioa osatu dute: «ez da emanaldi soila, ikerketa lanetik ere badauka. Zailena izan da garai hartako bertsoak biltzea», azaldu du Agirrek.
Duela bi mendeko bertsoak, garaiko doinuetan
Orain dela bi mendeko bertsoak ekarriko dituzte Hernanira, Fernando Amezketarrarenak batzuk eta garaiko beste zenbait bertsolarirenak besteak: Txabolategi eta Agustin Iturriaga, esaterako.
Gainera, ordukoak izan daitezkeen doinuetan kantatuko ditu Agirrek, Kamioren pianoaz eta Atxegaren gitarraz lagunduta: «aukera izango da, duela bi mendeko bertsolaritza, tematika, kezkak... ezagutzeko, modu entretenigarrian».
«Fernando nor zen jakiteko, bere bertsoak dira iturri fidagarriena»
Bertsolari gisa, Fernando Amezketarra nor zen ezagutzeko aukera ere bada, gaurko emanaldia: «berari buruz asko ikertu da, baina bere bertsoak dira iturri fidagarriena. Eta benetan Fernando nor zen jakiteko, esaten zuena ikertu behar da», argitu du Eñaut Agirrek.