Preso gaixo larrien egoera salatzeko prentsaurrekoa eman zuen atzo Hernanin, Buruntzaldea mailako preso gaixo larrien sustengu plataformak.
Azaldu zuten: «500 preso politikoen artean asko salbuespen egoera larrian daude: sakabanaketa, bizi arteko espetxe zigorrak, isolamenduak... Eta ezin ahaztu gaixotasun larriak dituzten 10 euskal preso politikoak». Horien artean daude Gari Arruarte eta Ibon Fernandez Iradi hernaniarrak.
Konpromisoa egoerarekin bukatzeko
Horrekin guztiarekin bukatzeko herriz herri martxan jarri diren eta jarriko diren ekitaldietan parte hartzeko konpromisoa eskatu zuten: «gatazkaren konponbiderantz, Euskal Herriaren elkarbizitza demokratikorantz, inoiz baino beharrezkoago dugu espetxe politika honen zutabe diren salbuespen neurriak etetea eta gaixo dauden presoak etxera ekartzea».
Konpromiso horietako bat gaur hartuko dute: Martuteneko espetxera martxa egingo da 11:30etan Zinkoeneatik abiatuta. Urtarrilaren 10ean, berriz, Bilbon Manifestazio Nazionala egingo da.
Hernaniko Ernaik, bestalde, 11 konpromiso askatasunerantz ekimena antolatu du.