Asteazken gauean ez da seguru halakorik izanen, baina garai batean bai. Garai batean kopla kantari ateratzen ziren Aranon, Urte Zahar gauean. 2013ko Miaxiria aldizkarian, Erramun Huici eta Roke Ansak utzitako testigantzak bildu zituzten eta horiek ekarri nahi izan ditu gogora Kronikak.
Argirik gabe, ez farola, ez literna, ibiltzen zirela gogoratzen zuen Ansak. Hementxe, kopla batzuk:
Zapata zuri paperez
euri denean baterez
nagusi jauna esan zaiguzu hasiko geran edo ez!
Dios te salbe, ongi etorri
gabon Jainkoak diela
egiarekin kunpli dezagun
urte zaharren despeida/
urte berriyan sarrera.
Gauean, gaupasa egiten zuten herriko baserrietan kantatzera joateko. Batzuetan aterik ez irekitzea ere tokatu zitzaien aurrekoei, baina Ansak ez zuen gogoan. Zaharrei entzundako kopla, honakoa:
Ematekotan emazu
bestela ezetz esazu
Mari Anttoni deitzen dan hori
alu bizartzu zera zu!
Tailerrak eta erakusketa
Umeentzako jolas tailerrak izanen dira asteartean (10:00-13:00) Aranon. Erakusketa bat ere antolatu dute eskolako umeek egindako lanekin eta Gabonetan zehar egonen da ikusgai Kontsejun.
Etxez etxe kantari, Olentzero, Miaxiria...
Olentzerok ere badaki Aranorako bidea eta opari ederrak ekarri zizkien asteazkenean aranoarrei ere. Horien artean, Miaxiria aldizkaria.
Aurretik, etxez etxe ibili ziren kantuan eta bazkaria ere egin zuten San Roken.