Hileko azken ostirala da gaurkoa, eta Hernaniko preso eta iheslarien senideek ekintza berezi bat prestatu dute: zapi-katea osatzeko deia luzatu dute, iluntzeko 20:00etan, Kale Nagusia eta Andre Kale lotuz.
Aurreko ostegunean mozioa aurkeztu zuten senideek, presoen egoera azaltzeko eta haien eskubide guztiak errespetatuak izan daitezela eskatzeko. Hori lortzeko politikarien konpromisoa eskatu zuten. Era berean, herritarrei ere dei egin zieten gaurko eta datozen ekintzetan parte hartzeko. «Urtero bezala gabonak heldu dira, eta gure senide presoak Euskal Herritik oso urruti ditugu, urrutiegi. Dispertsioak gabonetan ere errepidean jartzera derrigortzen gaitu, eta gure bizitza arriskuan jarri beharrean gaude».
Igandean Martutenera; urtarrilaren 10ean Bilbora
Bestalde, igandean, hilak 28 Martuteneko kartzelara martxa antolatu da, 11:30etan Zinkoeneatik abiatuta. 12:30etan ekitaldia egingo da espetxean bertan. Hernaniko Sortuk ere bertara joateko deia luzatu du.
Azkenik, urtarrilaren 10ean Manifestazio Nazionala egingo da Bilbon, 17:30etan hasita, Dispertsioari Stop lemapean.