Aurreko astelehenean (abenduak 15), partehartze ordenantzaren zirriborroa aurkeztu zien herritarrei Andoni Gartzia alkateak. Herritarren ekarpenekin osatu du zirriborro hau Udalak. Horretarako, 3 bilera egin dira eta internetez ere ekarpenak egiteko aukera izan dute herritarrek.
Orain, prozedura administratiboa abiatuko da ordenantza indarrean jartzeko. Lehenengo, guztiz osatuko da eta gero, partehartze batzordera bideratuko da. Udalak gogorarazi du, batzorde guztiak herritarrei irekita daudela, eta astigartarrak animatu nahi ditu bereziki batzorde honetara hurbiltzeko, «Udalaren eta herritarren arteko harremanetarako horren garrantzitsua izango den ordenantza hau ezagutzera». Bertan eztabaidatu eta gero, Plenora eramango da behin behineko onarpena emateko. Ondoren, 30 eguneko epean, alegazioak aurkezteko aukera izango da. Azkenik, Plenoak eman beharko dio behin betiko onarpena. Epeak betetzen badira, 3 hilabeteren buruan Astigarragak partehartze ordenantza izango du.
Gobernu Taldea kritiko azaldu da EAJrekin: «Ekarpenak egin dituzten herritarrenganako errespetu falta da».
Gobernu taldea pozik, emaitzarekin
Gobernu taldeak, ekimenaren balorazioaren berri eman du eta oso pozik agertu da: «Oso aberasgarria izan da eta ekarpenak egin dituzten herritar guztiei gure esker ona adierazi nahi diegu».
Baina gaineratu du ez dela dena positiboa izan eta EAJk prentsan zabaldutako kritikak izan ditu hizpide: «EAJk egindako adierazpenak ez dira oso ulergarriak. Partehartze prozesua eta ordenantza osatzeko bilera hauek kritikatzen dituzte eta ez dira bileretara azaldu ere egin. Ordenantzaren proposamena nola kritikatu dezake norbaitek bere edukia ezagutu gabe? Bileretara etortzeko aukera izan dute, beste edozein kolektibo edo herritar bezala, baina ez etortzea erabaki dute; eta alkatetzako bulegoko ateak ere parez pare zabalik dituzte, beste edozein herritar edo talde bezala, gai honen edo beste edozeinen inguruan informazioa eman eta eztabaidatzeko. Inoiz ez dute, ordea, esfortzu txiki hori egiten. Dirudienez, EAJ hauteskundeen dinamikan bete-betean sartuta dago eta mahai gainean jartzen den edozer gauzaren aurka jotzen dute, kasu gehienetan, berau ezagutu ere egin gabe. Garraioaren hiriarekin ere berdin gertatu zen, eta Udalak helegitea ez jartzea salatu zuten, Udalak helegitea jarria zuenean. Jarrera hori oso larria da gainera, bileretara etorri eta Astigarragan parte hartzea sustatzeko asmoz ekarpenak egin dituzten herritarrenganako errespetu falta ikaragarria direlako eta egin duten ekarpena gutxiesten ari direlako».