Azkenean iritsi da Eguberri bezpera! Arratsaldeko 18:00etan iritsiko da Olentzero Hernaniko Plazara, eta kalean barrena ibiliko da, herritarren azken desioak entzuten.
Aurretik, ordea, musika eta gabon doinuak izango dira nagusi, herriko kaleetan.
Goizean, ikasleen txanda
Egunaren aurreneko partean ikastoletako ikasleak aterako dira kaleak kantuan alaitzera. Goizeko 10:00etan Inmakuladako ikasleak abiatuko dira; 10:30etan, Urumeakoak; 11:00etan, Langile ikastolakoak; eta 11:45etan, Elizatxo ikastolakoak.
Arratsaldean, errondak, kontzertuak eta Olentzero
Arratsaldean musikak eta Olentzerok partekatuko dute protagonismoa. Eguerdiko 15:30etan Biterin elkartuko dira bertso eskolakoak, auto-busa hartu eta baserriz baserri buelta egiteko. Arratsaldeko 17:00etan, berriz, Parrokiko abesbatzak gabon kantuekin osatutako kontzertua emango du, Agustinetan.
Olentzero arratsaldeko 18:00etan iritsiko da Plazara, eta Ttarlako dantzariek lagunduta kalejiran ibiliko da. Tartean, 18:30etan, Kantuz abesbatzako kideak aterako dira errondan, Milagrosatik. Musika Banda, berriz, 20:00etan abiatuko da, Plazatik.
Presoen aldeko Olentzero
Iluntzeko 20:00etan presoen aldeko Olentzero aterako da Plazatik. Aurreko osteguneko Plenoan onartu zen mozioa, senideek aurkeztutakoa, dispertsioaren aurka eta presoen eskubideen alde konpromisoa hartzekoa. Ekitaldi honetan eta datozenetan parte hartzeko deia luzatu zuten.
Eguberri eguneko alborada
Gabon gauean musika, eta Eguberri egunean gehiago. Bihar goizean ‘Hernani’ Musika Eskolako txistulariek alborada joko dute herriko auzo eta kaleetan barrena.
Gabonetako kontzertua, astelehenean
Pasa den astelehenean kontzertua eman zuten Milagrosan Hernani Musika Eskolako Hernasax taldeak, txistulariek eta abesbatzak. Jendeak gozatu ederra hartu zuen Gabon doinuekin.
Gabonetako bi ohar, Udalak
Zabor bilketaren ordutegian aldaketak izango dira. Bestalde, material piroteknikoarekin neurriak hartzeko eskatu dute.
Hiru egunetan aldaketak izango dira zabor bilketan. Gaur eta hilak 31n, organikoa lehenago jasoko dute, beraz, 22:00ak baino lehen atera behar da kuboa. Bestalde, ostiralean paper eta kartoi bilketa berezia egingo da goizean; 14:00ak baino lehen atera behar dira.
Material piroteknikoarekin kontuz
Babes Zibilak bidalitako oharra ere zabaldu du Udalak, material piroteknikoaren erabileraren inguruan. Oharrean azaltzen du Hernanin ez dagoela horrelako materiala saltzeko baimenik duen dendarik, eta baimena duten tokietan bakarrik erosi daitekeela.
Bestalde, hainbat gomendio eman ditu: ez gorde horrelakoak poltsikoetan, ez manipulatu osagaiak, ez bota petardoak pertsona edo animaliei... Neurriak hartu eta arauak errespetatzeko dei egin dute.