Pelotako Euskal Selekzioak protagonismo berezia izango du Gabonetan. Euskal Pilota Federazioak lau jaialdi antolatu ditu, eta partidu bat jokatuko da Hego Euskal Herriko probintzia bakoitzean: Gipuzkoan, Bizkaian, Araban eta Nafarroan. Helburua da, Euskal Selekzioaren ofizialtasuna jorratzeko bidean, lanean jarraitzea.
Mexiko, Munduko irabazlea
Munduko Pilota Txapelketa bukatu berria da, eta Mexiko izan da garaile. Hain zuzen, Mexiko, munduko talde onena izango da Euskal Selekzioaren aurkaria, lau partidu hauetan. Euskal Selekzioarekin Hernaniko hainbat kirolarik hartuko dute parte: Paul Ojuelek, Amaia Irazustabarrenak eta Ariane Arrietak.
Aurrenekoa, Hernanin
Lehendabiziko jaialdia Gipuzkoan jokatuko da, Hernanin hain zuzen. Igandean izango da, Kiroldegian, 17:30etan.
Udalak sarrerak emango ditu
Hernaniko Udalak, ekimena babeste aldera, hainbat sarrera erosi ditu. Batzuk pelotazale txikientzat izango dira, eta besteak banatu egingo ditu. Bihar eta ostiralean eskuragarri izango dira Kiroldegiko bulegoan, 09:00etatik 13:00etara. Pertsona bakoitzak 2 sarrera hartu ahal izango ditu; eta iritsi ahala joango dira banatzen. Salgai ere izango dira, 10 euroan, Txili, Onddi eta Zintzarrin.