Euskal Pilota Federazioak proiektu bat du eskuartean, Euskal Herriko Selekzioaren ofizialtasunarekin zerikusi zuzena duena.
Azaltzerik bai?
Azken urteetan gabezia haundia egon da pelotan, Euskal selekzioaren kontua dela eta. Duela urte eta erdi Euskadiko Pilota Federazioko lehendakaritza hartu genuenean argi geneukan zerbait egin behar genuela. Pelota, Euskal Herrian sortutako kirola da eta Nazioartean lehiatzeko aukerarik ez izatea lotsagarria da. Guzti horregatik, Nazioartean selekzio gisa lehiatzeko bidea egiten ari gara. Harremanetan gaude Nazioarteko Federakuntzarekin, Munduko Txapelketetan etab, Euskal Selekzio gisa parte hartzeko.
Zein da egoera?
Nahasmen haundia dago. Alde batetik legea dago; eta bestetik, interesak. Sokatirak lortu du Nazioartean lehiatzea, besteak beste, Espainiak selekziorik ez duelako; eta batez ere, oihartzun haundirik ez duen kirola delako. Futbola, adibidez, beste muturrean dago, gizartean duen eragina medio. Euskal Selekzioak Munduko futbol txapelketa jokatuko balu, askorentzat independentziaren pare legoke. Hala ere, sokatira berdina da batean edo bestean, legea berdina baita. Borondatean eta interesetan dago ezberdintasuna, Nazioarteko Federazioak elkarte pribatuak dira, eta elkarte pribatuetan sartzeko eta irteteko aukera zuzendaritzek ematen dute. Azken hilabetetako gure lana izan da Nazioarteko Federazioari eta Pelotari oro har esatea, Euskal Selekzioa ofiziala izatea komeni dela. Hori argudiatu dugu, eta txostenetan aurkeztu dugu.
Beraz, saiakera bat baino gehiago egin dituzue.
Bai. Pelotaren kasuan saiakera bat baina gehiago egin ziren Nazioarteko Federazioarekin, duela 14 eta 8 urte; antzuak izan ziren biak. Gerora, duela 8 urte, Eusko Jaurlaritzak sortu zuen Munduko Pilota Batzarra, Nazioarteko Federazio moduko bat. Tamalez honek ere ez du aurrera egin.
Eman diren pausu horiek kontuan izanda, itxaropentsua al da etorkizuna?
Euskal selekzioaren gaia, Nazioarteko Federazioaren mahaian jartzea lortu dugu, eta liskarrik gabe gainera. Harremanak onak dira eta epe ertainean Euskal Selekzioak parte hartzeko aukera izango duela uste dut. Gabonetako jaialdiak dira horren adierazle, Nazioarteko Federazioak begi onez ikusi ditu jaialdi hauek.
Euskal Selekzioaren ofizialtasunak zer emango lioke Euskal Herriari?
Aitortza, eta horren beldur dira Espainiako Federazioak, eta atzetik politikariak. Euskal Selekzioa ofiziala balitz, herri bat badela onartuko litzateke eta hori ez dute onartu nahi.
Hernanin jokatuko da Gabonetako jaialdiaren partiduetako bat. Zeintzuk dira helburuak?
Pilotako selekzioa mapan kokatu nah dugu. Jaialdi hauek, ofizialtasunaren bideko lehen urratsak izatea da helburua.