Urtezahar egunez, abenduak 31n, korrikalariz beteko da Hernani. Wukroren aldeko San Silbestre lasterketa antolatu dute, bigarrenez. Angel Olaranen iritziz, jendea kontzientziatzea lortzen du lasterketak, «eta hori laguntza haundia da». Izen ematea zabalik dago, 6 euroan: www.kirolprobak.com, Ibai Mendi eta Pelotadenda. Egunean bertan, 10 euro.
San Silbestrea antolatu zenuten iaz, aurrenekoz. Nolako esperientzia izan zen?
Ni ez nintzen egon, Wukron nengoelako, baina transmititu zidatena izan zen ilusio haundia. Antolatzaileak oso pozik geratu ziren. Lasterketaren inguruan oso giro berezia eta polita sortu zen, Wukroren egoeraren kontzientzia oinarri zuena. Eta parte hartzea ere haundia izan zen, 450 korrikalari Wukrori laguntzeko festan.
Eta nola laguntzen dio lasterketak Wukrori?
Kontzientziazioa da punturik garrantzitsuena. Hori laguntza haundia da. Hernanin, herritar gehienek daukate Wukroren berri, ezagutzen dute bertako egoera, gutxi asko. 5.000 kilometro daude Hernani eta Wukroren artean, eta ematen du ondoko auzoa dela; oso gertuko sentitzen da. Lasterketarekin, Wukro herritarren agendan jartzen dugu berriro, nolabait esateko. Eta gabonetan gaudela, beharbada laguntzera animatuko dira. Wukro Hernanira ekartzen dugu, eta Hernanitik laguntza eramaten dugu Wukrora.
«Lasterketarekin, Wukro herritarren agendan jartzen dugu berriro. Eta gabonetan gaudela, laguntzera animatuko dira agian»
Zergatik lasterketa bat?
Askotan, irudimen kontua izaten da. Izan zitekeen futbol partidu bat, antzerki saio bat, kontzertu bat… Baina harrera ona daukaten ekintzak dira lasterketak, oso giro atseginean eta gertukoan ospatzen direnak. Beste zenbait lasterketa ere egiten dira, helburu solidarioengatik.
San Silbestreak hiru helburu ditu: aurrenekoa, Wukroren errealitatea ezagutaraztea. Zein da bere errealitatea?
Behar ekonomiko haundia dago Wukron, eta lasterketak ekarpen bat egiten dio behar horretan. Elikaduran segurtasunik ez dago, haurrek ez daukate ziurtatuta jatekoa izango dutela. Eta horrek, garapen mentalean ere eragina dauka. Osasungintzan ere, arazo bat dago. Den dena ordaindu behar du pazienteak: bendak, gasak, eskularruak...; hezkuntzan, berriz, oso ondo irakasten den arren, altzari gehiago behar dira, desertu antzean baitaude eskolak...
Bigarren helburua da Wukron oinarrizko kirola sendotzea.
Haurrei kirola praktikatzeko aukera eman nahi diegu. Helburua ez da kirolari profesionalak edukitzea, nahiz eta maila haundikoak ere ateratzen ari diren. Gure nahia da, haurrek kirola praktikatzea, giza baloreak barneratzeko modu gisa, bide batez.
Eta hirugarrena, gabonetan festa egun polit bat pasatzea. Nola ospatzen dituzte gabonak Wukron?
Gabonek indar haundia daukate, baina ez dute hemengoekin antzik. Oso festa goxoak dira. Dantza egiten dugu, kantatu, jan eta edan… Ez daukate hemengoen kutsu kontsumista.