Astigarragan bada ingeles akademia bat London School of Languages izenekoa. Astigarragaz gain, beste hiru zentru ere baditu Gipuzkoan: Donostian, Urnietan eta Oiartzunen. Eta Kronikari jakinarazi diotenez, London School of Languages akademia, Cambridge Unibertsitateak onartutako zentru bakarra da Euskal Autonomia Erkidegoan, CELTA (Certificate in English Language Teaching Adults) ikastaroa emateko. «CELTA, mundu mailan dagoen titulurik ospetsuena da, irakasle prestakuntzan, eta oso harro gaude, munduan, baimendutako 300 zentru inguru bakarrik daudela kontuan hartuz. Eta estatu mailan, 9 Autonomia Erkidegotan bakarrik irakasten da», azaldu dute. Ingelesa irakasteko aukera gehien eskaintzen dituena ere badela gaineratu dute: «Izan ere, estatu mailan, Euskal Autonomia Erkidegoa, ingeles ikasle gehien dituenetako bat da, eta ikasleek lanpostu bat lortzeko aukera haundiak dituzte. Eta munduan zehar ingelesa irakasteko aukera gehien eskaintzen duen titulua da».
Irakaskuntzan esperientzia gutxi dutenei zuzendua
Ikastaro hau, irakaskuntzan esperientzia gutxi daukatenei dago zuzendua, batez ere, eta ingeleseko C1–C2 maila izan behar dute. Prestakuntzaren barruan, ikasleak, lehenengo egunetik hasiko dira klase praktikoak ematen, benetazko ikasleekin. Ikastaroak 4 asteko iraupena du eta 120 klase ordu ematen dira.
Deialdi berriak: martxoan, uztailan eta urrian
Joan den uztailean eskaini zuten lehenengo CELTA ikastaroa London akademian, Donostiako zentruan, eta oso gustora daude emaitzekin. 2015 urteari begira, deialdi berriak antolatzen ari dira. Lehenengoa, martxoan izango da, eta hurrengoak uztaila eta urrian. Informazio gehiago: london-school.com/celta.