Auzitegi gorenak Osoko Bilkura du gaur Madrilen. Bertan erabakiko dute, euskal presoek Espainiatik kanpoko kartzeletan egin dituzten urteak kontuan hartu edo ez. 50tik gora euskal preso daude egun, egoera horretan. Hau da, Espainiatik kanpo beteta dituzte urteak, ez zaizkie kontuan hartu Espainiara mugitzean.
Europar Batasuneko Itunak dio, aurretik betetako urteak kontuan hartu behar direla. Itun horrek diona aplikatu zaie dagoeneko preso ohi batzuei: Joseba Urrosolo, Carmen Gisasola, Santi Potros eta Alberto Plazaolari esaterako. Modu berean, 50tik gora euskal presok kartzelak utzi beharko lituzkete. Hori saiheste aldera, Espainiako Gobernuak lege bat onartu du.
Orain arte, Audientzia Nazionalak eman ditu honen inguruko epaiak, eta kontrajarriak izan dira. Auzitegi Gorenaren helburua da, gaurko Osoko Bilkuran hartzen den erabakia izatea definitiboa, hau da, irizpideak batzea eta preso guztiei berdin aplikatzea.
Sei hernaniar, aurrez Frantzian egonak
Hernaniarren kasuan, sei dira aurrez Frantziako espetxeetan egonak, eta egun Espainiako kartzeletan daudenak: Baldo, Kepa Pikabea, Beñat Aginagalde, Joanes Larretxea, Ainhoa Garcia eta Asier Ormazabal
«Pikabeari ukatu egin zioten»
Kepa Pikabea hernaniarraren kasua da, euskal presoetako batena. Maite Goizueta bikoteak Kronikari azaldu dionez, Pikabeak eta Carmen Gisasolak batera aurkeztu zuten 2013an, Europako diktamena aplikatzea: «Gisasolaren eskaria onartu egin zuen epaile batek eta aske utzi zuen. Pikabearen kasua beste epaile batek aztertu zuen, eta ez zuten askatu. Onartezina da. Ez dakit baten batek oraindik sinesten ote duen justizian...». Kepa Pikabeak 21 urte egingo ditu kartzelan: «Parot Doktrinaren kasua aplikatu izan baliote, kalean behar luke. Eta orain aske utziko balute, aterako litzateke kondena osoa, eta gehiago beteta».
Kontzentrazioa, Hernaniko Sortuk deituta
Hernaniko Sorturen esanetan, PPren espetxe politika kriminalarekin bukatzeko, indar eta bide guztiak aktibatu behar dira: «bide judiziala jarraitu, aktibazio eta mobilizazio sozialak biderkatu, babes politiko eta konpromiso instituzionalak indartu behar dira». Sortuk dio, PPren Gobernuaren presioak sortu duela egoera hau: «PP Europatik datozen arauak urratzeko prest dago, euskal preso politikoei ezartzen dien espetxe politikari eusteko».
Egoera salatzeko, hernaniar guztiei egin diete dei gaur kontzentraziora. Espetxe politika kriminalari, STOP. Presoak Etxera izango da lema, eta 19:00etan kontzentratuko dira, Plaza Berrin.