Saharako kulturaren zati bat dago ikusgai Biterin, ostiralera bitarte. Pintura erakusketa jarri du Abdi Ami Omar margolari sahararrak: «nire herriaren errealitatean daude oinarrituta, eta dramatismoa eta alaitasuna elkartzen saiatu naiz». Saharan jaio eta Kuban ikasia, mundu osoan zehar ibili da: «todoterreno bat naiz», dio berak.
Nola deskribatuko zenuke erakusketa?
Aukera bat da hernaniarrei erakusteko eta beraiekin konpartitzeko Saharako kulturaren zati bat. Saiatu naiz bilatzen aspektu ezberdinak erakusteko modua: tradizioak, ohiturak, Saharako errealitatea... Eta oreka bilatu dut: dramatikoa da gaia, baina toke alai batekin landu ditut, kolore alaiekin margotuta, hain justu.
Sahara Hernanira ekarri nahi izan duzu, beraz.
Bai, Saharako ekosisteman daude kokatuta, eta hango errealitatean oinarrituta. Hori izan da gaia, egin ditudan erakusketa guztietan. Nire beharra da Saharako herriaren enbaxadore izatea.
Nolako koadroak dira?
Ia denak oleoarekin eginda daude, eta estilo errealista eta superrealistakoak dira. Hori bilatzen du nire erakusketetara datorren jendeak.
Nondik datorkizu pinturarako ohitura?
Ez dakit, txikitatik daukat gaitasun hori, eta baita zaletasuna ere. Eskolan, irakaslea azalpenak ematen ari zenean, nik marrazten eta margotzen ematen nuen denbora gehiena.
Mundu osoan zehar egin dituzu erakusketak.
Toki askotan egon naiz, bai. Kuban 18 bat urte eman nituen, eta erakusketa asko egin, Saharako ospakizunak irudikatuz, ezagutzera emateko. Argelen egin nuen beste bat, Saharako enbaxadaren kultur etxean. Eta Australiako Sydney eta Melbourne hirietan ere egon dira nire koadroen erakusketak. Koadroen eskaerak, berriz, beste toki askotatik jaso ditut: Suitzara, Erresuma Batura, Estatu Batuetara... bidali ditut nire lanak. Irlandako eta Sudafrikako kanpo ministroek ere badauzkate nire koadroak.
Denbora asko daramakizu jaioterritik kanpo.
Ia bizitza guztia eman dut kanpoan, todoterreno bat naiz. Beste herrialde batera noanean, bertan egon banitz bezala da. Baina horrek aukera eman dit, toki guztietako jendearekin harremanak egiteko.
Noiztik zaude Hernanin?
Hamaika hilabete dira etorri nintzela, urtebete laster. Oso gustora nago hemen. Euskal jendea eta instituzioak oso solidarioak dira Saharako herriarekin, eta asko eskertzen dugu laguntza. Bi herriek, gainera, asko daukagu komunean: bi Estaturen artean gaude banatuta. Txori baten bi hego bezala gara, Euskal Herria eta Sahara.