Kontrakantxa gaztetxeak bizirik segitzen du, eta zortzigarren urteurrena ospatze aldera, ekitaldiz betetako astea antolatu dute. Bi urte itxita egon eta gero, orain hilabete gutxi ireki zituen ateak Kontrakantxak: «ilusio haundia genuen, Hernaniko gazteok berriro ere lokal publiko bat genuelako». Dena ez da ordea, espero bezain borobila izan: «hilabeteak pasa dira, eta errealitatea bestelakoa izan da. Horrelako lokala izanda ere, eta erabilera gutxi ematen zaio...».
Urteurrenaren aitzakia perfektua izan da, herritarrak gaztetxera gerturatzeko: «helburua da jendea erakartzea, eta egiten ditugun gauzetara engantxatzea. Denon artean sekulako lana egin dezakegula uste dugu, batez ere, hastera goazen urteari begira».
«Hiru taldek joko dute, 22:30etan hasita: 3gabe2,
Luz de putas eta Dj Aratz. H.»
Egun borobila, gaurkoa
Festa giroan itxiko dute, ospakizun astea. Trikipoteoan abiatuko dira, eguerdiko 12:00etan, Plazatik. Eguerdian gaztetxean dute zita, bazkaria antolatu baitute.
Festa giroak ez du etenik izango goizaleko ordu txikiak arte. Arratsaldeko 18:00etan Buruntzantzan batukadarekin kalejiran ibiliko dira, herria girotzeko gogoz. Eta 22:30etan da beste ekitaldi nagusia: kontzertuak. Hiru taldek jarriko dute erritmoa: 3gabe2, Luz de putas eta Dj Aratz. H.