Asanblada Irekia egingo du Hernaniko PSE-EEk bihar, 11:00etan Biterin. Bertan izango da Odon Elorza Donostiako alkate ohia ere. Helburua da hernaniarren proposamenak eta ideiak jasotzea, eta denen artean, programa osatzen hastea, datorren urteko Udal Hauteskundeetarako.
«Herritarren ekarpenak jaso nahi ditugu, guztion artean herria hobetzeko», azaldu du Hernaniko PSE-EEk.
Horregatik, alderdiak dei egin die herritar guztiei, biharko saiora azaltzeko eta parte hartzeko. Programa osatzeko, zenbait gai landuko ditu bihar biltzen den lan taldeak: birsorkuntza demokratikoa, herritarren parte hartzea, gardentasuna...
Parte hartzeko triptikoak, buzoietan
Herritarren parte hartzea sustatzeko, beste ekimen bat ere jarri dute martxan. Egun hauetan, parte hartzeko triptikoak banatu dituzte buzoietan. «Herritarren ekarpenak jaso nahi ditugu, Hernaniren beharrak hobeto ezagutzeko, eta guztion artean gure herria hobetzeko», azaldu dute.
Udal Hauteskundeetarako programa osatzeko baliatuko dituzte proposamen horiek ere: «programa parte hartzailea osatu nahi dugu, herritarren proposamenak jarraituz».
Horretarako, eskatu diete triptikoak betetzeko proposamenekin, eta Casa del Pueblon (Elkano kalea) entregatzeko .