Udaletxeko Harrera Zerbitzu berria ezagutzeko aukera izango dute gaur herritarrek. Ate irekien saioa egingo dute, 17:00etatik 20:00etara, eta Herritarren Harrera Zerbitzua aurkeztuko dute Udal Gobernu Taldeko kideek. Udaletxeko sarreran jarri dute zita.
Zerbitzu berria azaltzeko, gainera, eskuorriak bidaliko dituzte etxeetara. Helburua da bulego bakarrean zentralizatzea, udaletxean egin beharreko tramite guztiak. Horrela, errazagoa eta erosoagoa izango da herritarren eta Udalaren arteko harremana, azaldu dutenez.
Gero eta tramite gehiago, harreran bertan
Hasieran, eskaera haundiena duten tramiteak hartuko ditu Harrera Zerbitzuak. Baina, pixkanaka, tramite eta zerbitzu gehiago eskainiko ditu.
Gainera, www.hernani.eus web orriaren bitartez, tramite asko egin ahal izango dira, ziurtagiri digitala edo Harrera Zerbitzuan emango duten gakoa erabiliz.
Goizeko ordutegia
Goizez izango da aukera tramiteak egiteko: astelehenetik ostiralera, 08:00etatik 14:00etara. Dena den, Erregistroa eta Biztanleen-Errolda tramiteetarako, ordutegia zabalagoa izango dute: astelehenetik ostiralera, 08:00etatik 19:00etara; eta hileko aurreneko eta hirugarren larunbatean ere izango da aukera, tramite horiek egiteko, 10:00etatik 13:00etara.