Sirena hotsak entzungo dira gaur, eguerdiko 12:00ak aldera, Hernanin eta Ereñotzun. Larrialdi kimikoen simulakroa egingo dute, herriko industria kimikoetan, eta horretarako, alerta-sirenak aktibatuko dituzte. Horrela, konprobatuko dute behar bezala funtzionatzen dutela, eta noizbait ihes kimikorik gertatzen bada, herritarren segurtasuna bermatuta egongo da. Hain justu, ihes kimikoen berri ematen duten sirenak dira aktibatuko dituztenak.
Aldizkako probak, segurtasuna bermatzeko
Simulakroaren berri eman du Eusko Jaurlaritzako Larrialdiei Aurre Egiteko eta Metereologiako Zuzendaritzak. Azaldu dutenez, aldizka egiten dituzte horrelako probak, Seveso araua betetzeko. Industria kimikoen segurtasuna bermatzea da helburua.
Simulakroaren inguruan edozein zalantza izanez gero, deitu 945 06 44 51 telefono zenbakira.