Txapeldunorde izan da Arnaitz Lasarte, berriro ere, Xenpelar Sariaren finalean: «beti bigarren izatea ez da atsegina, eta gainera, horixe izaten da pena haundiena, irabaztetik gertuen geratzea». Baina pena baino, poza dauka haundiagoa, egindako saioagatik: «oso gustora geratu nintzen egindako saioarekin».
Nerea Ibarzabal markinarrak jantzi zuen txapela, 562,5 puntu lortuta, Lasartek baino 20 puntu gehiago. Biak aritu ziren buruz buruko lehian, nor baino nor, txapeldun izateko. Bertso onenaren saria, berriz, Maider Arregi oñatiarrak jaso zuen.
«Maila haundiko bertso saioa izan da»
Ibarzabalek eta Lasartek jokatu zuten txapela, baina orokorrean, bertsolari guztiak nabarmendu zituzten Jesus Mari Irazuk eta Beñat Gaztelumendi bertsolariek, saioa amaitu berritan: «maila haundiko bertso saioa izan da».
Arnaitz Lasartek berak ere, saio polita izan zela azaldu du: «barrutik desberdin ikusten dira gauzak, baina maila txukuna izan zuen finalak. Gauza onak egon ziren. Esango nuke ondo hasi ginela, binakako saioan, baina gero moteldu egin zela, bakarka aritu ginenean».
«Luze jo zuen saioak, 21 bertso kantatu nituen»
Polita bezain luzea izan zen finala, ereñotzuarrak azaldu duenez: «luze jo zuen saioak, guztira 21 bertso kantatu nituen. Eta azkenerako, luzeegi ere egin zitzaigun».
Lasartek berak, freskotasun falta nabaritu zuen bukaeran: «hasieran, ofizioko saioan aritu nintzen gustorago, freskoago ere banengoelako. Baina oro har, beti moldatzen naiz hobeto binakako saioetan, umorea ere jokoan sartzen denean». Hala izan zen finalean ere: «buruz buruko lehian, gehiago kostatu zitzaidan».
«Hasi eta berehala poto egin nuen; ondo etorri zitzaidan ez konturatu izana»
Aurreko sariketetan baino erosoago aritu zen Lasarte: «izatez naiz urduria, baina konfiantza gehiagorekin aritu nintzen finalean, eroso». Segurtasun guztia galtzeko zorian egon zen, ordea: «hasi eta berehala, poto egin nuen, baina ez nintzen konturatu ere egin. Ondo etorri zitzaidan, konfiantza mantentzeko».
Gazteen artean, azkeneko sariketa zuen Lasartek, eta ez irabaztearen pena geratu zaio: «19 eta 23 urte artean, bertsoari denbora gutxiago eskaintzen nion, eta orain engantxatu naiz berriro. Pena da ezin lehiatzea gehiago, gazteekin».
Hurrengo erronka, Gipuzkoako Txapelketa
Bertsoaren saltsan jarraitzea du helburu Lasartek, eta jarri du hurrengo erronka: Gipuzkoako Txapelketa, maiatzean. «Hirugarren aldia izango da, baina konfiantza gehiago daukat orain. Kanpoan geratuz gero, ez da aurreneko aldia izango. Eta txapelketan ematen dudan pauso bakoitza, ongietorria izango da».
https://www.youtube.com/watch?v=tLISyccv5HQ&feature=youtu.be
https://www.youtube.com/watch?v=Y-Be_NAECGg&feature=youtu.be
https://www.youtube.com/watch?v=iBdq8YTiIEU&feature=youtu.be
https://www.youtube.com/watch?v=Tix7-IIEqH0&feature=youtu.be
https://www.youtube.com/watch?v=pJWdMkQktwQ&feature=youtu.be
https://www.youtube.com/watch?v=B3sYC358Z3k&feature=youtu.be