Udal taldearen azken lau urteetako lanaren balantzea aurkeztu zuen EH Bilduk ostegunean, Biterin egindako herri batzarrean. «Elkarrekin Hernani hobetzen ari gara», azaldu zuten. Izan ere, balantzea egitean hiru ardatz azpimarratu zituzten: etxebizitza, ingurumena eta partehartzea.
Era berean, hurrengo lau urteetarako EH Bilduren programa finkatzeko martxan jarriko den herri dinamikaren berri ere eman zuten. Hiru herri topaketa egingo dira urtarriletik martxora bitartean.
Etxebizitza, ingurumena eta partehartzea, ardatz
Etxebizitza arloari dagokionez, azpimarratu zuten udal etxebizitzen funtsa osatu dela, eta, oraingoz, 12 etxebizitza eskuratu dituela Udalak. Laster, gainera, beste batzuk gehituko dira Karabeleko etxeak eta AMR Ladrillos fabrika zegoen eremuan egingo diren etxeak kontuan hartuta. Herritarrek ere egin zuten ekarpenik; hala nola, herriko lurrak ondare publiko bihurtzea eta etxebizitza hutsetan eragitea.
Ingurumenari dagokionez, azpimarratu zituzten auzo konposta zabaltzea lortu izana, eta Ereñotzuko bilketa sistema hobetu izana. Bestalde, Herri Baratzeen parkea sortzea, bidegorri sarea zabaltzea, eta ur-hornikuntza hobetzea lortu dutela ere azaldu zuten, eta azken honen kasuan, baita urtero 150.000 euro eta ura aurreztea ere.
Herritarren partehartzearen alde egindako ahaleginaz ere hitz egin zuten. Nabarmendu zuten auzo elkarteekin biltzeko Partehartze Batzordea finkatu dela, eta beste partehartze prozesu asko jarri direla martxan: aurrekontu partehartzaileak, kirol instalazioen ingurukoa, gazte lokalena, ikastetxeetan patinak erabiltzearen ingurukoa...
Hiru herri topaketa egingo dira urtarrila, otsaila eta martxoan, programa finkatzeko.
Interneten ere bada aukera udal balantze osoa ikusi eta balorazioa egiteko.
«Murrizketarik gabeko herria»
Bestalde, azaldu zuten: «egindako kudeaketari esker, Udala egoera ekonomiko onean dago, eta ongintza zerbitzuetan ez da murrizketarik egin».
Era berean, nabarmendu zuten Tokiko Garapen Agentzia sortu dutela, eta horrek eskualdearen ekonomia indartzeko, berritzeko eta eraldatzeko balioko duela. Batzarrean bildutako herritarrek, berriz, Orona Fundazioaren garrantziari egin zioten aipamena, eta EH Bilduko udal ordezkariek azaldu zuten «elkarlana habian» dagoela.
Programa finkatzeko herri topaketak
Osteguneko herri batzarra Hernaniko EH Bilduk deitutako aurrenekoa izan da, baina beste hiru herri topaketa deitu dituzte datozen hauteskundeetarako programa finkatze aldera.
Asmoa da, urtarrilaren 17an herriaren diagnostikoa egitea; otsailaren 21ean, Hernaniren lehentasunak finkatzea; eta martxoan, hauteskundeetarako programa onartzea.
Balantze osoa ikusi eta baloratu daiteke webgunean: www.hernani.ehbildu.eus.