Aurreko asteburuan jarri zen martxan Elikagai Bankurako janaria biltzeko kanpaina. «Urte osoan zehar ere eman daiteke, hori argi utzi nahi dugu. Baina horrelako kanpainak oso eraginkorrak izaten dira, eta aurtengo emaitza ikaragarria izan da», dio Carlos Martinez, Gipuzkoako Elikagai Bankuko arduradunetako batek.
Hernanin 21.800 kilo jaki bildu dira; aurreko urtearekin alderatuta, bikoitza, orduan, 11.300 kilo inguru jaso baitziren.
Igoera, orokorra
Martinezen esanetan, bildu den kilo kopurua aurreko urtean baino dezente altuagoa izan da aurten, estatu mailan ere. Baina Hernaniko igoera haundiagoa izan da, nabarmen.
«Estatu mailan, iaz baino %50 gehiago jaso da. Hernanin, berriz, aurreko urtean jasotakoaren bikoitza. Izan ere, 11.300 kilo janari inguru bildu zen aurreko urtean, eta, aurten, 21.800 kilo. Hernaniko biztanle kopurua kontuan hartuta, esan daiteke biztanle bakoitzak kilo bat baino gehiago eman duela! Gipuzkoan, berriz, 350.000 kilo bildu ziren aurreko urtean, eta 575.000 kilo, aurten; %65 inguru gehiago», azaldu du Martinezek.
Boluntarioek, lan izugarria
Hernanin, iaz bezala, 3 puntutan bildu da janaria: DYA, Lidl eta Eroski supermerkatuetan. Gipuzkoa osoan, 70 gune inguru jarri dira. Eta noski, toki horietan guztietan, boluntarioek egin dute lan. «Hernanin 60 boluntario inguru aritu dira lanean. Eta boluntario horien artean, gehienak, Gabriel Celayako lokaletan janaria banatzen aritzen diren boluntario berak dira».
Banaketa, hileko aurreneko astelehenetan
Bildutako janari guztia Oiartzungo biltokira eraman dute, sailkatu, garbitu, prestatu eta txukuntzeko.
Ondorez, Gipuzkoa osoan dauden banaketa zentroetara eramango da.
Hernanin, Gabriel Celayan dauden lokaletan egiten da banaketa, hileko aurreneko edo bigarren astelehenetan. «Datorren astelehena, abenduak 8, jai eguna denez, abenduaren 15ean egingo da banaketa», gogorarazi nahi izan du Martinezek.
«Hernanin oso ondo antolatuta dago banaketaren kontua. Udaletxeko Ongintza zerbitzuak, Amher elkarteak, Caritasek eta eliza ebangelikoak bat egin dute elkarte bat osatzeko. Horrek lanak errazten ditu. Janari banaketarako lokala dute Gabriel Celayan, eta hileko aurreneko astelehenetan irekitzen dute, arratsaldeko 17:00etan».