Ubarburu industriaguneko 30garren partzelako eraikinaren auzian, azken epaia iritsi da eta Astigarragako Udalak ez dio Construciones Biyak enpresari kalte ordainik ordaindu beharko. Gobernu Taldeak adierazi du, bere prokuradore eta abokatuen gastuei bakarrik egin beharko diela aurre. Construcciones Biyak enpresak helegitea jartzeko aukera izan du, baina uko egin dio eta epaia behin betikoa da.
Gobernu Taldeak jakinarazi du, epaiek 5 milioi eurora eraman zezaketela kalte ekonomikoa: «EH Bilduren gobernu taldeak, alkatetzara iristean, beste arazo potolo hau aurkitu zuen mahai gainean eta Astigarragako Udalaren etorkizun ekonomikoa zegoen jokoan. Gobernu Talde honek emandako urrats egokiei esker, Udalaren hondamendi ekonomikoa saihestu da», nabarmendu du.
«H1! eta EAJ, erantzuleak»
Auziaren nondik norakoa azaldu du Gobernu Taldeak: «Astigarragako udaletxean H1! eta EAJren gobernua agintean zegoela, lizentzia eman zitzaion Illarra New enpresari Ubarburu industriaguneko 30garren partzelan hiru pabilioi eraikitzeko. Illarra New S.L. enpresa Felix Elarrerena zen, Elgopebi auziko enpresaburu berarena. Beraz, Elarreri pabilioi berri bat izateko aukera eman zioten Ubarburun. Pabilioi berriaren parean zegoen Construcciones Biyak enpresak, ordea, epaitegietara jo zuen eraikin horrek bere interesak kaltetzen zituela ondorioztatuta. Epaitegiek baliogabea zela esan zuten Illarra New S.L. enpresari emandako baimena. Eta lizentziaren irregulartasunean oinarrituta, Astigarragako Udala kondenatu zuten Ubarburuko 30garren partzelako eraikina botatzera, bertan kokatuta zeuden enpresei kalte ordainak ordaintzera, eta pabilioia berriz eraikitzera, legeak ezartzen zituen baldintzetan».
Epaiaren epeak aprobetxatuz, Gobernu Taldeak Ubarburuko birpartzelazio proiektua erreskatatu zuela eta aurrera ateratzea lortu zuela gaineratu du, Donostiako Udalarekin egindako negoziaketei esker (poligonoa bi udalerrietan dago): «Honi esker, pabilioia legalizatu zen. Ondorioz, pabilioia botatzea neurriz kanpokoa zela argudiatu zen eta epaiak onartu egin zuen. Construcciones Biyak enpresari aukera zabaldu zitzaion kalte ordainak eskatzeko. Gaur ezagutzen dugun epai honek ukatu egiten dio Construcciones Biyaki kalte ordaina jasotzeko eskubidea. Hala ere, Astigarragako Udalak hartu beharko ditu bere gain prokuradore eta abokatuen kostuak».
Sententzia honek sentsazio gazi-gozoa utzi diola gaineratu du Gobernu Taldeak: «Gazia, nazkatuta gaudelako aurreko legegintzaldietan H1! eta EAJk egindako kudeaketa urbanistiko ankerra konpontzen horrenbeste energia eta Udal baliabide gastatu behar izanagatik. Beraien gobernua izan da Ubarburu auziko kalteen eta Elgopebi kasuan sortutako interesen (146.000 euro) erantzule zuzena. Udala ia ito larrian utzi dute eta hori salatzen jarraituko dugu».