Berrerabilpen zentroan aldaketa batzuk egiten ari dira. Batetik, erropa bertara eramateagatik ordaindu egingo dute, eta, bestetik, material berezia eraman eta saltzea lortzean ere, ordaindu egingo zaio material hori dendara eraman duenari.
Modu honetan, bultzada bat eman nahi diote bigarren eskuko erropa eta materialen salerosketari, gauza bakoitzari balioa emanez.
Erropa, kiloka
Hemendik aurrera, etxean behar ez dugun erropa dendara eramanez gero, bueltan dirutxo bat jasotzeko aukera izango da.
Hori bai, erropa hori oso modu onean eraman behar da: urraturik edo orbanik gabe, garbituta eta plantxatuta. 0 eta 16 urte bitartekoen erropa eramanez gero, pisatu egingo da, eta horren arabera ordainduko zaio jabeari. Berdin egingo da abrigo eta prenda bereziekin ere.
Materiala saltzean, ordaina jasotzeko aukera
Erropa ez den materialekin bestela jokatuko da. Dendara eramaten diren material bereziak (eskia egiteko ekipazioa, haurrentzako aulkiak...), saltzea lortzen denean, ordaindu egingo zaio material hori dendara eraman duenari.
Ostegun eroak
Beste berrikuntza bat ere jarri dute martxan: ostegun eroak. Noizean behin, ostegunez, bost prenda euro baten trukean erosteko aukera izango da.