Beltz Espirituala ere deitzen zaion Gospel musika entzuteko aukera izango da gaur, 22:00etan, Biteri kultur etxean. Hau izango da Hernani’n Musik ekimenaren barruan urte honetarako antolatutako azken saioa.
Sarrera guztiak salduta daude dagoeneko, eta, beraz, giro beroa espero da gauerako.
Hiru emakumeren jatorrira buelta, kantuarekin
Hiru emakume izango dira gaurko kontzertua eskainiko dutenak. Amerikako Estatu Batuetako Gospel musika emanaldia prestatu dute.
Hirurak ere, ibilbide luzea izan duten protagonistak dira, pop, funk, edota jazz musika estiloetan.
Baina gaurkoan, hiru abeslariek beren sustraietara, beren jatorrira, itzuli nahi izan dute. Horrela, ume eta gaztetan gurasoekin elizan entzuten zituzten kantu haiek berreskuratu nahi izan dituzte Divine Gospel Reunion ikuskizunerako.
Musika goxoa, eta aldi berean, erritmo haundikoa interpretatuko dute, eta energia eta emozioa publikoari transmititzea izango dute helburu.
Zine emanaldirik ez gaur
Musika emanaldia Biteriko areto nagusian izango da, eta, ondorioz, gaur ez da ostiraleroko zine saiorik izango. Bihartik aurrera izango da bi pelikula ikusteko aukera.