Hauteskundeetarako herri programa osatzeko dinamika aurkeztuko du gaur EH Bilduk, 19:30etan Biterin.
Batzar irekia izango da, eta herritar guztiak bertaratzera gonbidatu dituzte: «EH Bildu indar metaketarako tresna, aliantza politiko eta sozialak lortzeko tresna izaki, lau alderdien batuketa baino gehiago da. Herritarrekin herrira begira jarriz, ze Hernani nahi dugun erabaki behar dugu denon artean».
Batzarrak iraun bitartean haurrentzako zerbitzua jarriko da; dinamikak egingo dira.
Balantzea egin eta erronka berriak finkatu
Gaurko helburua izango da orain arteko legegintzaldiaren balantzea egitea, batetik, eta etorkizuneko erronka berriak zehaztea, bestetik.
«Gure herria ezkerretik eraikiko duen proiektu integrala, herritarrokin batera garatu nahi dugu. Azken urteetako parte hartze prozesuetan gehiago sakonduz, herritarrari hitza eman eta denon artean gure herriak dituen gabezi eta indarguneak kontuan hartuta, alternatibak diseinatzeko prozesua jarriko dugu abian».