Hernaniko Kaleratzeak Stop taldeak antzerki saio bat antolatu du gaurko, bankuekin izaten ditugun arazoen inguruko informazioa zabaldu, eta aldi berean, barre egin arazteko.
Sarrera doakoa da, eta hernaniar guztiak gonbidatu dituzte bertaratzera. Arratsaldeko 19:30etan izango da, Biterin.
«Gizarte arazoa da»
Antzezlana Oihulari Klown taldeko Virginia Imazek eskainiko du. Egiten dizkiguten estafak eta horiek eragiten diguten lotsa dira Imazek landuko dituen gaiak.
Hernaniko Kaleratzeak Stop taldeak jakinarazi du bi urte daramazkitela Hernanin, eta harrituta daudela ikusita nola bizi ditugun bankuekin izaten ditugun arazoak. «Barneratuta daukagu lotsa sentimendua, eta okerrena da, horrek oztopatu egiten gaituela irtenbidea aurkitzea. Ez da gizabanakoaren arazoa, baizik eta gizarte arazoa».