Mota guztietako eskulanak ikusi eta erosteko aukera zabala izango da gaur, Atsegindegin. 35garren Pablo Lasa Artisau Azoka jarriko dute, egun osoan zehar: goizean, 11:00etatik 14:30etara; eta arratsaldean, 17:00etatik 20:00etara.
30 postutik gora izango dira, eta eskulan eskaintza zabala: egurrezkoak, larruz eginak, xaboiak, bitxiak, jostailuak, eskulturak...
Lau tailer eta bi ikuskizun
Eskulanetan trebatzeko ere izango da aukera, lau tailer jarriko baitituzte: serigrafia, zurezko jostailuak, oihalezko panpinak eta makramezko pultserak. Bi ikuskizun ere izango dira: egur taila, Karlos Irazurekin; eta forja, E-Mendiren eskutik.